Are you Team Good Boy or Team Dave?
Sa nalalapit na pagtatapos ng Start-Up PH, malaking palaisipan sa mga manonood kung sino ang makakatuluyan ni Dani.
Matapos kasi ang halos apat na buwang pag-ere nito sa Kapuso Network ay nakatakda nang magwakas ang seryeng pinagbibidahan nina Bea Alonzo, Alden Richards, Jeric Gonzales, at Yasmien Kurdi.
Read: Bea Alonzo, Alden Richards lead powerhouse cast of Start-Up PH
Sa Biyernes, December 23, 2022, ang finale ng Start-Up PH.
Ito ang GMA-7 adaptation ng hit K-drama series na Start-Up, tampok sina Bae Suzy, Nam Joo Hyuk, at Kim Seon Ho.
Si Bea ay gumanap bilang Dani mula sa orihinal na karakter ni Bae Suzy na si Seo Dal-mi.
Si Alden naman ay si Tristan o mas kilala bilang “Good Boy” mula sa orihinal na karakter na ginampanan ni Kim Seon Ho na si Han Ji-Pyeong.
Ginampanan ni Jeric ang karakter ni Davidson Navarro o Nam Do-san, mula sa orihinal na serye ni Nam Joo Hyuk.
Ina o Won In-jae naman ang papel ni Yasmien na hango sa karakter ni Kang Ha-na.
Sa latest episode ng serye kagabi, December 21, 2022, naganap ang madamdaming paghihiwalay ng magkasintahang Tristan (Alden) at Dani (Bea).
Ito’y matapos malaman ni Tristan na hanggang ngayon ay may gusto pa rin si Dave (Jeric) sa kanyang girlfriend.
Kabaliktaran ito ng nangyari sa orihinal na kuwento ng Start-Up.
Sa orihinal kasi na serye ay hindi naging magkasintahan sina Han Ji-pyeong (Alden) at Dalmi (Bea) kahit pa na sila ang totoong magka-penpal.
Bukod kina Tristan at Dani, kaabang-abang din ang mga susunod na mangyayari kay Ina (Yasmien) laban sa kanyang stepfather na si Arnold (Gabby Eigenmann).
At tuluyan na nga bang isusuko ni Dave (Jeric) ang nararamdaman at pagmamahal niya kay Dani?
Sa natitirang dalawang gabi ng Start-Up PH, abangan kung sino nga ba ang magwawagi sa puso ni Dani.