Last year ay nagdesisyon ang mag-asawang sina Jessa Zaragoza at Dingdong Avanzado na manirahan sa Amerika at subukan ang buhay doon, kasama ang kanilang anak na si Jayda. Sa kanilang pag-alis, may mga intrigang lumabas na ang tunay na dahilan ng pagtira nila sa Amerika ay dahil wala na silang singing career dito sa Pilipinas.
Last week ay bumalik ng bansa si Jessa kasama ang anak niyang si Jayda para mag-promote ng series of concerts nila ni Dingdong sa Amerika. Sa guesting nito sa SOP last Sunday ay nakausap ng PEP (Philippine Entertainment Portal) si Jessa.
Nilinaw ni Jessa na hindi dahil wala na silang singing career dito sa Pilipinas kaya sila nagdesisyon ni Dingdong na manirahan na sa Amerika. Nabigyan daw kasi sila ng napakagandang opportunity kaya hindi na nila ito pinalagpas.
Nakangiting sinabi ni Jessa, "Sa mga nagsasabi na laos na daw kami... Na frustrated kami ni Dingdong kaya kami umalis, modesty aside, I think naman we've proven ourselves here in the music industry. So, ano pa ba ang kailangan naming i-prove? Kailangan ‘pag nag-isip ka, dapat next level, di stagnant ka na lang diyan."
Paliwanag ng singer, "In-offer sa amin yung green card so we grabbed the opportunity. Yung ibinigay na visa sa amin, special visa para sa lahat ng performers. Pero di lahat ng artista o singers ay nabibigyan nito, di lahat qualified. Heto yung oportunidad na mas maganda, mas malawak, bakit hindi?
"It's really for our daughter Jayda para may option siya paglaki niya. Pag naging [American] citizen na kami, and if ever mag-decide siya na gusto niya dito tumira o kaya puwede rin sa America, di na siya mahihirapan."
BUHAY AMERIKA. Pagpapatuloy ng tinaguriang Phenomenal Diva, "Talagang pinaplano naming yung future niya kasi kung kami lang, kung comfort ang iisipin namin, mas gusto namin dito. Sa America, walang helpers. ‘Pag gusto mong kumain, maghain ka ng sarili mong pagkain. ‘Pag gusto mo nang malinis ng bahay, linisin mo ang kubeta mo. It's truly a different set-up, lifestyle in the States."
Idinagdag din ni Jessa na dahil sa pag-alis nilang mag-anak sa bansa ay mas tumibay ang kanilang samahan bilang isang pamilya. Pero mas mahirap daw ang buhay nila sa Amerika dahil mas marami silang ginagawa doon.
"Actually, to be honest, mas mahirap and mas maraming trabaho. Aside from chores, mas marami kaming concerts doon. Every weekend may show kami sa awa ng Diyos," sabi ni Jessa.
"Si Dingdong, may iba siyang work aside from singing, although di siya nine-to-five job. He's a marketing manager sa isang mortgage business—their family business—so marami siyang clients na inaasikaso," aniya pa.
Naging issue before ang madalas na tampuhan ni Jessa at ng kanyang pamilya, particular na ang kanyang ina. Sa ngayon daw ay okay na ang relasyon ng singer-actress sa kanyang pamilya. Sa katunayan, kasama raw ni Jessa ang kanyang ina pagbalik niya ng Amerika bukas, January 19.
"Sabi ko sa Mommy ko, baka puwede niya muna akong tulungan kay Jayda. Kasi mahihirapan ako dahil walang yaya si Jayda, e may [concert] tour kami ni Dingdong," masaya pa niyang kuwento.
RUFA MAE QUINTO. Samantala, nang mag-guest si Jessa sa SOP last Sunday ay nagkaayos na sila ni Rufa Mae Quinto. Matatandaang nagkaroon ng alitan noon sina Jessa at Rufa Mae dahil kay Dingdong. Bago kasi naging mag-asawa sina Jessa at Dingdong ay nakarelasyon muna ng male singer si Rufa Mae.
"I can say na happy akong uuwi ng America ‘coz okay na kami ni Rufa Mae. Imagine, six years kaming di nag-usap at lalo pang napalala ang situwasyon dahil sa mga intriga," nakangiting sabi ni Jessa.
"Na-touch nga ako kasi off-cam, niyakap niya [Rufa Mae] ako, ‘tapos sinabi niya kina Regine [Velasquez, host ng SOP] na ‘Uy, kaibigan ko naman ito talaga dati.' Masayang-masaya ako sa nangyari and happy din ako ‘coz I've heard na masaya sila ni Erik [Santos]," dagdag pa niya bilang pangwakas.