May tips ang ilang celebrities kung paano maalagaan ang ating pets—mapa-aso man o pusa—habang nakakulong lang muna ngayon sa bahay.
Ang mga Kapusong sina Martin del Rosario at Ashley Ortega, isinasama sa kanilang workout ang kanilang fur babies dahil kailangan din daw maging active ng mga ito.
Para kay Jasmine Curtis Smith, prevention is better than cure, lalo na ngayong naka-Enhanced Community Quarantine laban sa COVID-19 ang lahat.
Importante raw na laging hydrated ang pets lalo na ngayong mainit ang panahon.
Ito rin daw ang panahon na malapit sa sakit ang mga ito kaya dapat laging bantayan ang kanilang kalusugan.
Sina Carla Abellana at Tom Rodriguez naman, nagpayo na huwag munang palabasin ang mga alagang hayop.
Kahit na hindi pa raw napapatunayan na maaaring mahawa ang pets ng COVID-19, maaari naman daw kumapit ang virus sa balahibo o fur ng mga ito.
Baka doon daw puwedeng mailipat ang virus sa tao.
Kung kinakailangang lumabas ang pet para dumumi o umihi, mas mabuting sa loob na lang ng kabahayan muna.
"Lahat naman tayo, kahit papa'no, may space naman in our households para dun na lang nila gawin," sabi ni Carla sa panayam sa kanila ni Tom ng 24 Oras reporter na si Nelson Canlas.
"Kung wala mang outdoor area tulad ng garahe, backyard o garden, puwede namang sa loob na lang ng bahay.
"Maglagay na lang ng sila ng newspaper, o kaya ng, may nabibili ngayon na puppy pad, yung mga wee-wee pad, mga ganun.
"Para maturuan din sila, opportunity na maturuan din sila na dun na lang sila muna," patuloy ni Carla na sinang-ayunan naman ni Tom.