Hindi nakaligtas ang former Pinoy Big Brother housemate na si Kian Kazemi nang ibuko siya ng talent manager na si Chit Ramos nang dumating ang Pinoy Big Brother (PBB) Season 2 exhousemate sa press conference ng Kung Fu Kids sa Studio 1 ng ABS-CBN kahapon, January 22.
"Delikado na si Mico [Palanca] sa kanya dahil nag-send na siya ng flowers, nabalitaan ko, kay Bea [Alonzo]," bungad ni Chit sa mga kasamahang press matapos siyang batiin ni Kian.
Hindi na nagawang itanggi pa ito ni Kian sa press at inamin na gusto pa niyang makilala nang husto ang young actress.
Unang nagkakilala sina Kian at Bea noong premiere night ng One More Chance last year. Simula raw noon ay nagustuhan na ng binata ang young actress
Para kay Kian, "Kasi simpleng, ano, parang tipo na hindi siya maarte. Kaya niyang sumabay sa kahit ano, cowboy o hindi. 'Tapos ano, palangiti [siya]."
Bukod sa pag-uugali, nagustuhan din diumano ni Kian ang pisikal na kaanyuan ng dalaga. "She's like the representation of the true Pinoy beauty. Kasi para talagang Pinoy na yung mga features niya, e. Kahit medyo mestiza siya pero kapag nakita niyo naman yung facial features, di ba? Parang more on the Filipino aspects, 'tapos parang sweet ang dating niya, e," paglalarawan ni Kian.
Sa kabila ng kanyang paghanga, wala naman daw siyang balak na ligawan si Bea dahil alam naman niya na may boyfriend na ang dalaga.
"Ayoko naman pong agawin. Parang kaibigan lang, para makilala lang. Hindi naman ako magnanakaw ng puso," paliwanag ni Kian.
Ngunit kung sakaling hindi attached si Bea ngayon, magpupursigi ba siyang ligawan si Bea?
"Mas madaling i-pursue kung walang attachment," sagot ni Kian. "Mas madaling gawin yun. Kasi matagal na rin akong single, bago pa mag-PBB."
Sa huli, nilinaw ni Kian na "admiration lang" ang kanyang nararadaman para kay Bea.