Pulos papuri ang natanggap ng young actor na si Jason Abalos kahapon, January 29, dahil sa kanyang pagganap bilang Leo sa Endo, isang independent film na unang ipinalabas last year.
Sa press conference ng Your Song: Muntik na Kitang Minahal sa 9501 Restaurant sa ABS-CBN Compound, maraming nakapansin na mature roles na ang madalas niyang gampanan ngayon, tulad ng kanyang role sa Endo at sa Sunday afternoon show na Your Song.
Pabor naman daw si Jason dito. Sa kanyang palagay ay mas mabuti diumano ito upang masubukan pa niya ang iba't ibang uri ng roles mapa-pelikula man o telebisyon.
Palagay pa niya, "Para sa akin mas maganda kasi parang mas makakatakas na ako sa pa-teenybopper na roles. Gusto ko rin po [ng loveteam], pero gusto ko rin na mas ma-challenge ako kasi kapag pa-tweetums parang wala lang, mas maganda yung nae-experience ko lahat."
Naitanong din ng PEP (Philippine Entertainment Portal) kung ano ang naramdaman niya nang malaman niyang may bed scene pala siya with Inah Feleo, na gumanap bilang Tanya, sa Endo.
"Si Inah [Feleo] kasi active talaga, e," panimulang kuwento ni Jason. "Talagang kung ano yung hinihingi ng istorya gagawin niya, so parang nadala lang ako kay Inah. Kasi, di ba, parang, ‘Babae pa 'to, siya pa yung hindi nahihiya, so, ako dapat ganun lang din. Kaya naman nung ginawa namin yung scene, sa kanya ako kumuha ng ano, siya pa yung nag-initiate pero eventually nakuha naming parehas."
INDIE FILM ACTOR. Matapos ang Endo, naging hiyang na si Jason sa mga independently produced na pelikula. Masusundan na ito ng isa pang indie film na gagawin ni Director Quark Henares, ang Rock and Roll.
Ayon kay Jason, mas masarap umarte sa indie film. Paliwanag pa niya, "Walang pressure, e. Ang sarap umarte, parang puwede kang umarte ng hindi ka robot, parang ganun.
"Kasi minsan [sa commercial films] gusto nila ng ganito, pero sa indie film, ‘So, ano ang pakiramdam mo diyan? Ano'ng gusto mong gawin diyan?' Ganun, parang mas nae-explore pa lalo. Open sila sa mga ideas."
Aminado din ang binatang aktor na mas mahirap ang commercial films. Aniya, "Mahirap [ang commercial films], unang-una, yung responsibility mo na kailangan kumita yung pelikula, kumita yung mga show."
Dagdag pa niya, "Kapag indie art lang talaga, parang walang formula kapag indie film, e, sa commercial kailangang magustuhan ng mga tao. Kapag indie basta makita yung art okay na, e, di ba?"
Samantala, malaki ang pasasalamat ni Jason sa pelikulang Endo dahil dito ay naranasan niya ang makapunta sa ibang bansa upang dumalo ng Festival Des Trois Continents (Nantes International Film Festival) sa France.
Maganda ang pagtanggap ng mga taga-France nang ipalabas ang kanilang pelikula. Nalulugod na kuwento ni Jason sa PEP, "Actually, nakakatuwa na kahit hindi nila alam yung culture ng Pilipinas pero parang nakaka-relate sila. Bago sila [lumabas] ng theater, sabi nila, ‘Bravo!'
Anong naramdaman niya noon?
"Unang-una masarap kasi sino ba naman ang mag-iisip na makakapunta ka sa ganun dahil lang sa isang indie film, di ba?" tuwang-tuwang sagot ni Jason.Dagdag pa niya, "Isang malaking bagay noong nakaraang taon kasi dalawang beses akong nakaalis ng bansa, e. Parang, ‘Wow!' 'Tapos isipin mo na hindi pa ganun na basta-bastang bansa lang na puwedeng puntahan, di ba?
Sa kabila ng matagumpay na pagganap niya sa Endo, hindi naman sinasara ni Jason ang kanyang pinto sa pagtanggap ng mga mainstream projects, tulad nga ng Your Song: Muntik na Kitang Minahal. Pahabol pa ng aktor, "Pero siyempre kailangan ko ng trabaho so gumagawa din ako ng commercial."
Sa ngayon, ayon kay Jason, anumang nakukuha niya sa kanyang career ay talagang pinaghihirapan niya. "Siguro parang gusto kong sabihin na pinaghihirapan ko ito kaya ito yung nakukuha ko. Parang lahat pa rin sa akin gusto kong paghirapan para mas maganda yung magiging bunga."
SHOCK ABSORBER. Hindi lingid sa publiko na dating naging on-screen partner ni Jason ang kontrobersyal na young actress ngayon na si Maja Salvador. Nagkasama ang dalawa bilang loveteam sa mga pelikulang First Day High (2006) at My Kuya's Wedding (2007).
Naitanong tuloy nang PEP kung nakapag-usap na ba sila ni Maja tungkol sa naging problema niya sa kanyang manager na si Chit Ramos.
Unang nasabi na ni Jason sa press na hindi pa sila nakapag-uusap ni Maja. Ngunit nang muli siyang tanungin ng PEP sinabi ng aktor na huli silang nag-usap ng aktres noong Linggo.
Sabi ni Jason, nagkukuwento naman daw sa kanya ang parehong kampo, Maja at Chit. "Actually, parehas lang sila [Maja Salvador and Chit Ramos] nagkukuwento sa akin. Ako lang yung parang taga-absorb lang muna nila."
Ayon kay Jason, hanggang doon na lang daw muna siya at ayaw niya munang makialam. Para sa kanya, "Ang hirap, e, ayaw kong makisali. Hangga't maari ayaw ko munang makisama, parang ganun. Hayaan ko lang muna maayos nila parehas. Pero sana maayos nila kasi sayang, e."
Nang magkausap sila ni Maja, binigyan ba niya ng advice ang dalaga?
"Well, unang-una hindi ko talaga alam kung ano talaga ang nangyari so hindi ako puwede magbigay ng advice. Sinabi ko na lang, ‘Hangga't kaya ninyong ayusin, ayusin niyo na lang.'"