Last July 9, Wednesday, ay bumalik na sa bansa ang magkasintahang sina Judy Ann Santos at Ryan Agoncillo from their Paris trip para sa Paris Film Festival, kung saan kalahok ang kauna-unahang pelikulang iprinodyus ni Juday, ang Ploning. Sinalubong ng Startalk ang dalawa sa Ninoy Aquino International Airport.
Kuwento ni Juday, "Actually, masaya! Very well attended naman ang lahat ng pelikulang ipinalabas sa Paris Film Festival. Nakakatuwa kasi yung mga ganoong okasyon, hindi magandang palampasin. Kasi once in a lifetime lang siya and, at the same time, nagkakaroon ka ng chance na maka-bond with your fellow co-workers, di ba?"
Kasabay na umuwi nina Juday at Ryan ang dating ka-love team ni Juday na si Piolo Pascual, na naging panauhin din sa Paris Film Festival. Sa pagkikita at pagkakasabay nilang yun, kinumusta ng Startalk sina Judy Ann at Ryan kung tuluyan na rin bang naayos ang naging gusot sa pagitan nila ni Piolo noon?
"Oo!" mabilis na sagot ni Juday. "Wala na namang issue. It's finished already. Matatanda na kami para riyan. Tapos na naman ang isyu, nakapag-usap na. Wala namang isnaban na nangyari. Nag-apiran sila ni Ryan. Nag-hi kami."
PREGNANT RUMOR. Halatang gulat na gulat naman ang dalawa sa sumunod na tanong sa kanila. Habang wala kasi sila sa bansa ay lumabas ang balitang buntis na raw si Juday kung kaya't engaged na sila at malapit nang magpakasal.
Biro ni Ryan kay Juday, "Ha? Sino tatay?"
"Paano nangyari yun?" natatawa namang biro ni Juday. "Hindi...siguro ano lang, nag-uumapaw lang ang kaligayahan ko and at the same time kasi, nakapagpahinga ako nang matagal. At siguro nakaganda rin yung nakapagbakasyon ako noong nangyari yung mga isyu. Nakapag-isip ako. Inisip kong mabuti kung ano ang mga dapat kong gawin, kung ano ang mga dapat kong sabihin."
Pero kung may sigurado man na magaganap, ito ay ang nalalapit nang pagpapakasal ng dalawa. In fact, pag-amin ni Juday, up to now ay ramdam pa rin niya ang kaligayahan nang mag-propose sa kanya si Ryan.
"Hanggang ngayon, yung happiness never-ending, e," sambit ng aktres. "Tuluy-tuloy yung palagi kaming magkasama. ‘Tapos, kapag tinititigan ko siya, parang ‘eto na nga...siya na nga. Magkasama kami habambuhay."
Humirit si Ryan kay Juday na parang nagdududa pa raw siya.
Natatawa tuloy na ikinuwento ni Judy Ann, "Palagi siyang nagtatanong, ‘Sigurado ka ba? Sigurado ka ba?' E, parang ako yata ang dapat na magtanong na, ‘Sigurado ka ba? Sigurado ka ba?'"
When Ryan was asked by Startalk kung sigurado na nga ba siya, maagap ang naging pagsagot nito: "Oo naman!"
At saka ibinuko ni Juday na nasa kanya raw ang passport ni Ryan.
"Oo, e, siya ang may hawak ng passport ko. Kahit nasa Maynila, nasa kanya ang passport ko," masayang kuwento nila.
MOMMY CAROL. Inamin din ni Juday na napanood niya ang maramdaming panayam ng Startalk sa kanyang butihing ina na si Mrs. Carol Santos noong nakaraang Sabado, July 5.
"In fairness naman sa lahat ng mga nanay, masakit din naman sa part nila yun. Part of them is hurting and, at the same time, part of them is happy dahil may makakasama na ang anak nila sa habambuhay. Kumbaga, may maninindigan na para sa anak niya," saad ni Juday.
Kinumpirma rin ni Judy Ann ang sinabi ni Mommy Carol kung paano sinabi ng aktres ang tungkol sa marriage proposal.
"Kaya nga noong araw na sinabi ko kay Mommy yun, natulog ako sa room niya. Because I want her to feel na it doesn't mean naman na kapag engaged na ako, hindi na ako ang baby niya. Kaya nga nang kinausap namin siya, ang una niyang sinabi sa amin, ‘O, e, mag-anak na kayo agad.' Kasi nga, tumatanda na."
When asked kung ano ang gusto nilang maging unang anak, pinaalala ni Ryan na meron na raw silang Yohan.
"So, preferably, boy naman sana para boy and girl na," saad ng dalawa.
Nagbigay rin ng kanyang reaksiyon si Judy Ann sa naging pahayag ni Mommy Carol sa posibleng pagkikita nilang muli ng ama ni Juday sa araw ng kasal ng kanilang anak.
"Actually, napag-usapan na namin yun ni Mommy at kami nga ni Ryan. Of course, gusto kong maging kumpleto yung pamilya, di ba? Ako na lang kasi ang kaisa-isang anak nila na hindi pa nakakasal, di ba?
"So sa pagkakataon na yun na lang ang chance na makakapag-picture-picture kami nang buo. Pero siyempre, ise-settle ko muna ang lahat. Ayoko namang may isang tao na hindi masaya sa araw ng kasal ko, di ba?
"So, gagawan namin ng paraan na maging maluwag sa parehong loob nila. Matatanda naman na kami. Matatanda na rin naman sila. So I guess, tama lang na isarado na yung mga chapter na yun sa buhay namin," pagwawakas ni Judy Ann.