Nakapanayam ng PEP (Philippine Entertainment Portal) ang young superstar na si Judy Ann Santos sa launch ng kanyang Canister Drive sa Tutuban Mall sa Divisoria kahapon, July 25. Kaugnay ito ng Touch A Heart Foundation ng aktres na ang aim ay makatulong sa ilang komunidad, higit sa lahat ang Aeta community sa Zambales.
Kakauwi lang ni Juday, kasama ang kanyang fiancé na si Ryan Agoncillo, mula sa pagge-guest nila sa Eat Bulaga! na ginanap sa L.A. Sports Arena sa Los Angeles, California.
Tinanong namin si Juday tungkol sa mga kumakalat na balita na hindi raw masyadong tinao ang Eat Bulaga! sa L.A. Pinabulaanan namin ito ni Juday dahil saksi raw sila sa dami ng Pinoy na gustong makapasok at makapanood ng palabas ng Eat Bulaga!
"Paano naman nila masasabi na hindi tinao, e, nandoon kami ni Ryan para masaksihan ang dami ng mga kababayan natin na sabik na pumila para makapanood ng show?" saad ni Juday. "Kung ako ay Pinoy na naka-base sa U.S., siguro isa ako sa mga pipila talaga at gagastos sa ticket para lang mapanood ang Eat Bulaga! Very honored kami ni Ryan kasi napili kaming maging special guest ng mga kinikilalang institusyon na ng Philippine television.
"Sabi ko nga kay Ryan na ang suwerte namin kasi kahit na mga artista kami ng kabilang station [ABS-CBN], kinuha pa rin nila kami ng Eat Bulaga! to be their special guest. But, of course, natutuwa kami kasi nakasama rin namin sina Marian Rivera at Dingdong Dantes na pinagkagulahan talaga sila.
"Noong pinapanood nga namin sila Tito, Vic, and Joey on stage, parang naging big fans kami ni Ryan ng tatlo kasi bihira ang ganitong pagkakataon na makasama namin sila. Mga genius talaga sila kasi lahat ng paraan na puwede nilang gawin para ma-entertain ang ating mga kababayan ay patok talaga. Ang nakakatuwa pa rito, nag-request talaga kami sa TVJ na magpa-picture kami ni Ryan with them. Talagang naging fan na kami ng TVJ!
"Malaki ang pasasalamat namin kina Tito, Vic, and Joey, pati na rin kina Tita Malou [Choa-Fagar] at Sir Tony [Tuviera] for the wonderful accommodation. Hindi nila kami pinabayaan talaga and they made sure na mag-enjoy kami sa pag-guest namin ni Ryan sa Eat Bulaga!" mahabang lahad ni Juday.
JUDAY'S DILEMMA. Hindi na rin pinalagpas ng PEP ang pagkakataon na matanong si Juday tungkol sa kumalat na issue tungkol sa pagpapa-interview ng kanyang ina na si Mrs. Carol Santos tungkol sa kanyang father. May mga sinabi raw na hindi maganda si Mommy Carol tungkol sa ama ni Juday na nakipagkita raw ito sa anak in L.A.
Ayon naman kay Juday, naiintindihan daw niya ang pakiramdam ng kanyang ina sa pagpapa-interview. Pero patas daw si Juday dahil pareho niyang magulang ang sangkot sa issue na ito.
"Wala naman akong kakampihan dito because pareho kong magulang ito," sabi ni Judy Ann. "Actually, family matter talaga ito at sana kami lang magkaayos dito. Pero dahil nagkaroon ng interview si Mommy at nakausap ko na siya regarding that... Wala naman talagang issue. Natural na reaction lang iyon ni Mommy kaya I understand her."
Nag-react daw kasi si Mommy Carol sa ginawang pagpapa-interview ng tatay ni Juday regarding sa pagpapakasal ng anak. Sabi naman ni Juday, wala siyang alam tungkol sa interview ng kanyang ama. Kailangan daw na mapanood niya muna ito para makapag-react siya.
"May nagsabi kasi sa akin na nagpa-interview daw si Daddy. Pero wala naman akong napanood tungkol doon. ‘Tsaka hindi kami nagkausap ni Daddy sa L.A. Dito pa kami sa Pilipinas huling nag-usap before ako umalis for Europe, so a month ago pa ‘yon.
"Kung may sasabihin sana sa akin si Daddy, nasabi na sana niya ‘yon sa akin para walang issue. E, wala naman talaga. Iba kasi ang nakarating kay Mommy kaya she reacted that way.
"Ang sa akin naman, madadaan ito sa magandang pag-uusap, e. Ako na siguro ang gagawa ng paraan na magkaayos na lahat. Magulang ko sila at ako lang siguro ang makakagawa ng way na magkausap sila ng walang nakikialam na iba," pahayag ng aktres.
Tiniyak din ni Juday na imbitado ang kanyang ama sa kasal nila ni Ryan. Hindi pa lang daw nila napag-uusapan kung sino ang maghahatid sa kanya sa altar.
"Invited si Daddy sa magiging kasal ko," diin ni Juday. "Kahit ano pa ang sabihin ng iba diyan, he's still my father. Walang Judy Ann Santos kung wala ang daddy ko. Kung ang hindi ko nga kadugo ay parte ng wedding, what more ang kadugo ko talaga, di ba?
"Yung tungkol naman sa paghatid sa altar, yun yata ang naging puno't dulo ng lahat. Hindi pa naman namin napag-uusapan ‘yan at matagal pa naman ‘yan. Siguro kapag maayos na ang lahat sa pamilya namin, doon na kami makakapagdesisyon. Sa ngayon, wala kaming problema ni Mommy at wala akong problema kay Daddy," pagtatapos ni Judy Ann.