Napabalita kamakailan na nagkasakit ang aktres na si Claudine Barreto. Sa katunayan, sa nakaraang Folded & Hung Streetcast 2 fashion show, halos hindi makapagsalita nang maayos ang aktres ng Iisa Pa Lamang dahil nawalan siya ng boses at kagagaling niya noon sa ospital.
Kinumusta ng PEP (Philippine Entertainment Portal) at ng ibang entertainment media ang kalusugan ngayon ni Claudine sa presscon ng kanyang bagong endorsement, ang Belo Essentials whitening cream, kahapon, Nobyembre 7, sa Steak Town Restaurant sa Sgt. Esguerra Street, Quezon City.
"Actually, hindi pa ako bumabalik for a check-up," pagkukuwento ni Claudine. "Pero kasi ganun pa rin, nalo-low blood, 90/70, 'tapos nag-90/75 ako. So, mahirap, may taping kami na talagang may nakabantay na nurse na kumukuha ng bp [blood pressure] ko. Hindi siya bumaba ng 90/70, hindi na siya umayos o naiba, sobrang low blood ko ngayon. Kasi, pinapatay ng white cells ko ang red blood cells ko."
Sa ngayon, ayon kay Claudine, "They're checking kung problema ba sa nodes, sa vocal chords, or sa blood kasi may inception ang blood ko, mas maraming white cells kaysa red [blood cells]."
Wala naman daw dapat ikabahala dahil pinayuhan naman siya ng kanyang doktor kung ano ang dapat gawin at inuming gamot. Aniya, "Meron akong iniinom para sa blood ko, para sa throat. But nothing to worry, nothing to worry pa naman. So, talagang papa-check pa lang."
HUNDRED SEQUENCES IN A DAY. Kaugnay ng kanyang pagkakasakit, pinabulaanan naman ni Claudine na naging sanhi siya ng delay sa mga huling araw ng taping para sa Iisa Pa Lamang.
"Even when I was sick, I was still working," depensa niya.
Sabay nagpaliwanag siya sa naging dahilan ng sinasabing delay sa taping at ang paggamit diumano ng double para sa kanyang karakter. Ayon kay Claudine, "Ang problema, we had parang kunwari, two taping days na lang. Siyempre, wala ng araw, wala ng ano, 'tapos dalawang director, dalawang separate unit. So, hindi na talaga kakayanin.
"Kunwari, nandito pa ako sa taping ng place na ito, 'tapos nauna na si, kunwari sa kabilang unit. 'Tapos kailangan gabi pero may araw na. So, naubusan talaga kami ng araw at gabi. So may mga kailangan talagang i-sacrifice na scene at may mga eksena na kinailangang i-double because impossible talaga."
Inulit pa ni Claudine na walang kinalaman ang kanyang pagkakasakit, bagkus talagang marami lang silang dapat kuhanan at hindi talaga kakayanin sa oras.
Dagdag na paliwanag ni Claudine, "We were doing 102 sequences in one day. All in one day we had to finish that and talagang alam naman natin na kahit physically maayos o hindi ang katawan mo, imposible.
"We really had to finish in two days. Maraming eksena lao pa't ako ang bida, hindi talaga kaya. Iisa lang ako, hindi talaga kaya na ilipat, magpalipat-lipat ng location. So, prinioritize yung mga eksena na kailangan."
Idiniin din ni Claudine na hindi siya nagiging pasaway sa anumang proyekto na gagawin niya. "If there's one thing na hindi ako, 'yon, unprofessional. Hindi ako nale-late ever since, hindi ako nagpapa-pack up ng taping, hindi ako ganun. At saka ngayon pa? So, kung sino man ang nagkakalat no'n, e, bahala na kayo."
OVERWHELMING SUPPORT. Kagabi, Nobyembre 7, nagtapos na ang teleserye na pinagbibidahan nina Claudine at Gabby Concepcion.
Bagama't tapos na ang Iisa Pa Lamang, natutuwa naman daw si Claudine sa suportang ibinigay ng kanilang masusugid na mga manonood.
"Masaya dahil overwhelming ang suporta ng mga tao," paglalarawan ni Claudine. "Kung papaano nila sinuportahan ang Iisa Pa Lamang... Ewan ko, ha, talagang na-overwhelmed lang ako kasi after giving birth, Maligno kasi was a sineserye. Ito [Iisa Pa Lamang] talaga ang pagbabalik ko sa primetime, na drama talaga. It's sobrang ganda, sobrang beautiful, sobra akong proud."
Naaliw din siya nang malamang marami ang gumagaya sa mga di makakalimutang linya ng karakter niyang si Catherine laban kina Scarlet (Angelica Panganiban) at Isadora (Cherry Pie Picache).
Para kay Claudine, "Nakakatuwa kasi minsan lang ako nanonood noong sa You Tube, ganyan. Nakakatuwa noong pinakita sa akin ni Direk Ruel [Bayani], sobrang nakakatawa, nakakaaliw, sobra."
Dagdag pa niya, "Ang sarap ng feeling na [ginagaya ng tao] ang mga lines na hindi makakalimutan. Kasi, 'yong mga lines na 'yon, minsan ginagawa na lang namin sa set 'yon, e."
Ano ba ang paborito niyang linya sa Iisa Pa Lamang?
Sa dami ng magagandang linya niya sa naturang palabas, tanging naisagot ni Claudine, "Naku, ang dami. Ang daming nagtatanong niyan."
ENOUGH OF ISSUE ABOUT ANGEL. Bago matapos ang panayam, humingi naman ng reaksyon ang entertainment media sa di matapus-tapos na isyu sa pagitan nila ni Angel Locsin.
Muli itong nabuksan nang magkaroon ng dalawang fashion show ang Folded & Hung at kapansin-pansin na hindi sila magkasama gayong pareho silang endorser ng nasabing clothing company. Sa unang fashion show, si Claudine ang finale, at noong sumunod na araw at sa ibang venue, si Angel naman ang huling rumampa.
Sa kabila ng intrigang ito, muling sinabi ni Claudine na maayos na ang lahat sa pagitan nila ni Angel. Sa katunayan, sinabi pa nito sa media, "Nate-text naman kami. Parang ang feeling ko, everything na puwede na naming pag-usapan, puwede na naman naming pag-usapan, di ba? Walang halong kaplastikan 'yong ganun, di ba?"
Nang tanungin naman ng PEP kung ano ang masasabi niya tungkol sa mga patuloy na nang-iintriga sa kanilang dalawa, sinabi ng aktres, "No comment na lang talaga."
Muli niyang siniguro, "Basta sinabi ko na okay kami, tapos na 'yon. Kasi, the moment na you keep on talking about it, hindi na talaga matitigil, di ba? You really have to put a stop na ito na, okay na. Okay kami."
Sa pagtatapos ng Iisa Pa Lamang, panandaliang mamahinga muna si Claudine. Wala pa siyang ideya kung ano ang tiyak na susunod niyang proyekto pero maaring magkaroon daw siya ng pelikula sa Star Cinema.