Nakausap ng PEP (Philippine Entertainment Portal) ang singer na si Erik Santos sa trade launch ng mga bagong shows ng ABS-CBN sa SMX Convention Center last Tuesday, November 25.
Kinuha namin ang kanyang reaksiyon sa pagli-link sa dati niyang girlfriend na si Rufa Mae Quinto kay Sam Milby, pati na rin ang breakup ng sexy comedienne sa Mexican-American boyfriend nito na si Bobby Lopez.
"Regarding kay Sam, una, hindi ako naniniwala," sabi ni Erik. "I don't think it's true, because I know P-Chi [palayaw ni Rufa Mae] personally and Sam is one of my friends. Hindi ako makakapagsabi ng komento. Pero ang masasabi ko lang, hindi ako naniniwala na may namamagitan sa kanilang dalawa. But if ever, let's say it's true, P-Chi is single, Sam is single also, so okay lang.
"Dun naman sa foreigner boyfriend niya, I never asked about the guy. Na-meet ko siya once, pero hindi ko siya kilala. And I chose not to ask anything about the guy. Ngayon, ang hirap namang mag-comment about sa breakup nila kasi never naman akong nagtanong kay P-Chi about him. Saka hindi ko rin alam ang sitwasyon nila kaya hindi ako makasagot."
Nagpahayag din ng hinaing si Rufa Mae na lagi siyang napagbibintangan na naninira ng isang relasyon, gayong wala naman daw siyang ginagawang masama. Dinepensahan naman ni Erik ang ex-girlfriend.
"Kahit naman nung kami, kahit papaano nali-link pa rin siya sa iba," sabi ni Erik. "Pero alam ko naman ang totoo na nung kami, at least nung kami, wala naman talagang iba. Yun lang ang puwede kong sabihin.
"Personally, mas kilala ko si P-Chi kaysa mas kilala siya ng ibang tao. For one year magkasama kami, kaya kilala ko ang ugali niya, kung sino talaga siya. Saka hindi naman problema sa akin kung ma-link siya, kasi natural lang yun. Normal ‘yan sa showbz, na kahit na sino puwedeng ma-link sa ‘yo," paliwanag ng singer.
Para kay Erik, anumang namagitan sa kanila ni Rufa Mae ay bahagi na lamang ng nakaraan.
"I can say that I already moved on," aniya. "Handa na ako for another relationship, pero hindi naman ako naghahanap. Kung may ibigay sa akin, much better. Pero kung wala, okey lang din.
"Right now naman kasi, I'm focused on my work. I have my new Christmas album, All I Want This Christmas, my single is ‘Christmas Is,' and this is composed by Mr. Jim Brickman. So I hope maka-avail sila ng album ko. Nag-aaral din ako in CEU, fourth year na ako. My course is BS Psychology."
Pero totoo bang may non-showbiz girlfriend na si Erik?
"Yung sinasabi nilang may girlfriend na raw ako, that's not true," tanggi niya. "Sa concert kasi ni Sarah [Geronimo], nanood kami. Nagkataon na na-focus yung camera sa aming dalawa nung kasama namin, then nabigyan na ng kulay.
"Wala kong girlfriend. May mga taong nagmamahal sa akin, may minamahal ako. Pero yung special someone, sana dumating na nga."
Single si Erik at free din naman ngayon si Rufa Mae, hindi kaya madugtungan uli ang nakaraan nila?
"Iba-iba na kasi ang priorities naming dalawa," sabi ni Erik. "Mas masaya kami bilang magkaibigan. Pag nandiyan na kasi yung tensyon, tampuhan, selosan, ayoko na ng ganun. Minsan pag nag-invite siya or nag-invite ako, and free naman kami pareho, we go out. Saka ngayon, sobra din ang pagtatrabaho ni P-Chi para sa pamilya niya."