Halos mahigit isang taon din nang huling makita ang beteranang aktres na si Sylvia Sanchez na gumanap sa isang soap opera. Ang huli ay ang Crazy For You (2006), kasama nina Luis Manzano at Toni Gonzaga. Ngayon, ay nagbabalik siya bilang ina ni Cristine Reyes sa TV adaptation ng 1976 movie na Eva Fonda.
Ayon kay Sylvia, kakaiba ang karakter niya rito kumpara sa mga nagampanan na niya sa mga dati niyang proyekto. "Ito kasi, kakaiba dahil sobra siya talagang mabait na character. Sa buong show, three times lang siya nagwala," paglalarawan ni Sylvia.
Gayundin, sa Eva Fonda, napansin niya ang talento sa pag-arte ng mga nakababatang artista na kasama niya, partikular na bidang si Cristine.
"Isa sila doon sa mga magagaling umarte," ani Sylvia, "Like si Cristine, nagulat ako kay Cristine kasi magaling talaga siya umarte. Ilang taon pa lang siya ngayon, bata pa lang siya. Kapag nagkaedad na siya, mga 25, marami na siyang na-experience, gagaling pa lalo 'yan."
Dahil sa matagal na rin niyang karanasan sa mundo ng pelikula at telebisyon, binibigyan din daw ni Sylvia ang mga batang artista ng mga payo sa pag-arte. Tulad kay Cristine na madalas niyang makaeksena, sabi ni Sylvia, "Nagbubulungan na lang kami kung ano'ng dapat gawin."
Patuloy pa niya, "Kasi minsan, siyempre bago si Cristine, minsan ako ang naka-front sa camera, ang ginagawa ko, sinasabihan ko siya, ‘'Nak, dito ka sa side para ikaw ang naka-front sa camera. Ibinibigay ko sa kanya kasi, alam mo yun, siya 'yong bida."
PASSION TURNS INTO PROFESSION. Inusisa naman ng PEP (Philippine Entertainment Portal) kung ano ang kanyang pinagkaabalahan habang wala siyang proyekto sa telebisyon.
Kuwento ni Sylvia, "Nag-stop ako kasi nag-aral ako ng culinary for one year. Every day ako nasa school, Academy for International Culinary Arts sa may Pasig. So, nag-aral ako, every day nasa school ako na para akong high school student.
"Ngayon, nag-o-OJT (on-the-job training) sa Mickey's Delicatessen, isang restaurant sa Makati sa Jupiter Street. One month na akong nag-o-OJT doon, 'tapos mga less than a month, mga three weeks tapos na ako. 'Tapos ga-graduate na ako, diploma kasi ang kinuha ko."
Ano naman ang naging dahilan kung bakit niya naisipang mag-aral ng pagluluto?
"Passion ko kasi talaga magluto, e, gusto ko talagang magluto," sagot ng aktres. "Bukod nito, nagluluto talaga ako. Bukod sa showbiz, ito 'yong pangalawang hilig ko.
"Since natuloy ko na ang showbiz, nabakante rin naman ako ng almost one year na walang show. Di ba, sinasabi nga nila dapat may fallback ka? Ito ang ginawa ko. So, kapag wala akong taping, at least nasa restaurant ako, kumikita pa rin ako."
Kumusta naman ang kanyang karanasan sa pagbabalik-eskwela?
"Noong una ayaw nila akong lapitan kasi salbahe ako, kasi 'yon ang nakikita nila. Hindi ako kinakausap, nakatingin lang nang patago na nahuhuli ko silang nakatingin lang!" natatawang kuwento ni Sylvia.
Patuloy niya, "Ako na mismo ang gumawa ng paraan na maging kaibigan ko sila. Kasi nga, di ba, hindi mo rin sila masisisi, gano'n 'yong nakikita nila. Sabi nga nila sa akin, ‘Akala namin salbahe ka.' Kasi, 'yon ang nakikita sa TV, naging kaibigan ko silang lahat."
Bago pa man magtapos sa nasabing kurso, nakapagplano na rin si Sylvia ng kanyang gagawin pagkatapos ng kanyang pag-aaral.
Aniya, "Mayroon akong restaurant ngayon sa Greenhills, 'yong TJ's. Balak ko pang magtayo. Actually, nagmi-meeting na kaming lahat, inaayos na 'yong isang restaurant sa Metrowalk at isa sa Cebu. Ako 'yong magiging chef doon at saka mayroon din akong ibang kasama. Ako ang tututok doon."
Pagkatapos ng isang taong pag-aaral, tututukan muna daw ni Sylvia ang kanyang planong negosyo. Kasabay nito, maaaring kumuha siya ng short courses kaugnay pa rin sa pagluluto.