Hinirang bilang Best New Male TV Personality sa nakaraang 22nd Star Awards for TV, paunti-unti ay gumagawa na ng sarili niyang landas sa showbiz ang Pinoy Big Brother Teen Edition Plus second placer na si Robi Domingo.
Sa pagkapanalong ito ng young actor, inamin ni Robi sa PEP (Philippine Entertainment Portal) kasabay ng pag-uwi niya ng nasabing karangalan ay ang pagdagdag naman ng pressure na kailangang ipakita niya na karapat-dapat nga talaga sa kanya ang nasabing award.
"So overwhelming!" bulalas ni Robi. "In fact, I was not expecting anything like this. I was not exepcting na ma-nominate even. But I don't know, it's kind of weird, I'm speechless right now, wala akong masabi. Ang dami kong gustong pasalamatan, pero hindi ko alam kung sinu-sino ang dapat unahin.
"Ang sarap ng pakiramdam, pero mas pressured that I have to prove to them that I'm deserving of this award, and that's what I'm gonna do. Nandun yung pressure, pero kailangang pag-ibayuhin ko pa ang sarili ko and be a better artist everyday," sunud-sunod na sabi ni Robi nang makausap siya ng PEP pagkatapos ng Star Awards for TV last Sunday, November 30.
BEING COMPARED WITH RICO YAN. Noon pa man ay marami na ang nagsasabi na kahawig ni Robi ang namayapang aktor na si Rico Yan at habang tumatagal ay mas nakikita ang resemblance nila. Para sa young actor ay malaking karangalan ito sa parte niya.
"Very, very flatered ako na ikinukumpara ako sa kanya ‘cause he's one of the most prestigious actors and personalties in the showbiz industry. Grabe ang impact niya sa tao, di ba? Being compared with that guy, salamat nang sobra. I really want to take the path of Rico Yan, except yung nangyari sa kanya, yun lang," ani Robi.
Sumakabilang buhay si Rico noong March 29, 2002 sa edad na 27 dahil sa acute hemorrhagic pancreatitis.
ATENISTA VS. LA SALLISTA. Sa kabila ng pagsasabong sa kanila sa loob ng Bahay ni Kuya—si Robi bilang Atenista at si Josef Elizalde na taga-La Salle—sinabi ni Robi na totoong magkaibigan silang dalawa ni Josef.
"Sinabi ko before sa loob pa lang ng Bahay ni Kuya na wala akong pakialam sa ganyang mga bagay, it's school, something na hindi dapat pag-awayan o paglabanan. Everyone naman is different. And for me, hindi man kami nagtatagpo ni Joseph minsan sa mga qualities, magkaibigan kami."
Mas lalo pang tumindi ang competition between Robi ang Josef dahil pareho silang inili-link sa PBB Teen housemate nila na si Nicole Uysiuseng. Aware ba si Robi na may mga isyung lumalabas na mag-on na raw sina Nicole at Joseph?
"Actually, hindi ko alam kung sila na nga ba o hindi. Pero no matter what happens, I'll be supporting them all the way through. Kami, wala kaming hidwaan or anything. Kung sino ang gustong i-pair ng management sa akin, I'll accept it and no grudges," pagtatapos ni Robi.