Sa kauna-unahang pagkakataon, pagkatapos ng tagumpay ni Manny Pacquiao laban sa Mexican-American boxing great na si Oscar de la Hoya, nakausap siya nang live via phone patch ng Showbiz Central kahapon, December 7.
Umpisa pa lamang ay puro pasasalamat na ang namutawi sa bibig ni Manny habang kinakausap ng dalawang hosts ng Showbiz Central na sina Pia Guanio at John "Sweet" Lapus.
Nanalo si Pacquiao via TKO nang umayaw na si De la Hoya pagkatapos ng Round 8.
Mukhang sa umpisa pa lang ng laban, halatang confident na ang Pambansang Kamao. Ni isang round lang ay hindi niya napagbigyan si De la Hoya. Bakit kaya ganoon na lang ang naging bagsik ni Manny sa laban na ito?
"Siyempre, malaki siya. Hindi natin pinagbigyan ng pagkakataon na makaporma pa siya. Pero alam mo, nadinig lahat ng dalangin ko sa Mahal na Panginoon, na manalo sa fight na ito," saad ni Manny.
Tinanong naman ni Sweet si Manny kung ano ang pakiramdam na natalo niya ang tinaguriang Golden Boy?
"Masayang-masaya ako," sagot ni Pacman. "Alam mo, hindi lamang para sa akin pero galing sa Mahal na Panginoon ito. Because of my faith to God, nanalo ako. Sa Kanya lahat galing ito at para sa Kanya ang karangalan na ito."
Sinabi ni Pia kay Manny na bilib na bilib sila kay Manny sa pananalig niya sa Diyos dahil nakikitang palagi siyang nagdarasal. But how does it feel na wala sa ringside ang kanyang pregnant wife na si Jinkee Pacquiao para panoorin siya?
"Mas pabor sa akin yun, kasi hindi ako magwo-worry na yung asawa ko, buntis, nasa corner ko. So, nag-decide na lang ako na sa hotel na lang siya manood para hindi siya masyadong ma-stress at hindi ako masyadong mag-worry," sabi ni Manny.
Nasaktan man lang ba siya kahit konti sa naging laban nila ni De La Hoya? Kapag pinapanood daw kasi si Manny at natatamaan ay parang wala lang ito sa Filipino boxer.
"Nasaktan din doon sa mga tama niyang pailan-ilan. Pero talagang ganoon ang boxing. Natitiis ko naman ang mga suntok niya."
Siyempre pa, itinanong din ni Pia kay Manny kung ano ang pakiramdam niya sa sinabi ni Oscar na si Pacquiao na ngayon ang idol ng Golden Boy.
"Alam n'yo, kahit tinalo ko si Oscar, iniidolo ko pa rin siya. Ako, alam n'yo lahat ng ito, hindi ko kayang i-explain, pero galing itong lahat sa Panginoon."
Would he say na mas mabagal si De La Hoya ngayon kung ikukumpara sa mga nakaraan niyang laban?
"Hindi naman...mabilis naman siya ngayon," sagot ni Manny. "Kaya lang, hindi siya makasuntok ng marami. Tuwing sinusuntok ko siya, kina-counter ko siya sa katawan. Actually, na-surprise siya sa kanan ko. Ang binabantayan kasi niya, naka-focus siya sa kaliwa ko. So, he's very surprised sa kanan ko."
Natawa na lang si Manny sa sinabi ni Sweet na yun daw yata ang naging sikreto ni Manny ngayon. Lalo pa't ang bilis ng galaw nito, to think na nagdagdag siya ng timbang.
Ayon kay Manny, darating na siya sa bansa sa Wednesday, December 10, pero hindi niya kasama si Jinkee. Maiiwan siya sa Amerika dahil nasa late stage na ito ng pregnancy at doon na ito maghihintay hanggang sa makapanganak.
May plano na ba siya sa muling laban niya at kung sinuman ang naiisip niyang makalaban pa?
"Sa ngayon, wala pa naman akong iniisip. Trabaho ng promoter ko ‘yan para makipag-negotiate sa ibang boxer. Sa ngayon, ako, bakasyon muna ako. Spend time with my family. Birthday ko rin sa December 17, at kailangan ko rin umuwi dahil marami pa akong gagawin. At saka, yun nga, bakasyon muna."
Huling laban na ba niya ang engkuwentro nila ni De la Hoya.
Natawa si Manny sabay sabing, "May mga ilang laban pa."