Mag-iisang taon nang Kapamilya si Cristine Reyes. February of this year nang lumipat si Cristine Reyes sa ABS-CBN from GMA-7. At kitang-kita naman sa aura ni Cristine na masaya siya ngayon bilang isang Kapamilya.
"Sobrang happy at marami na rin naging kaibigan at hindi naman ako nalulungkot. Like sinasabi ng iba na iba raw sa ABS, ganyan-ganyan, pero, hindi naman. Nang magtagal, talagang naging at home na rin ako. Kapag taping ng Banana Split, lahat kaming girls, kulitan. Nakaka-text-an ko.
"Kahit yung sa Kahit Isang Saglit, nakaka-text-an ko. Si Direk Jerry Sineneng, si Carmen Soo, kahit nasa Malaysia siya, nagkaka-text kami. Naging close ko rin yung mga nasa Eva Fonda. Marami na at nakakabuo na rin ako ng group of friends sa ABS," kuwento pa ni Cristine.
Hindi naman itinanggi ni Cristine na na-tension daw siya nang husto nang unang emere ang kanyang unang pinagbidahan na primetime series.
"Sobra! Nasa plane pa ‘ko nun, galing akong Davao. Hindi ko napanood ang pilot, e. Pray ako nang pray na sana, mataas ang rating. ‘Tapos, Tuesday nalaman. Pinakamataas siya sa primetime! So, sobrang saya! Hindi ko naman hinahangad na mataasan lahat, ang sa akin lang talaga, sana mag-rate.
"So, happy ako kasi, ito ang first lead ko. So, happy ako na mataas ang rating niya at parang tingin ko pa lang sa akin, nagsisimula pa lang. At least, nahabol din."
DARING EVA. Idinepensa naman ni Cristine ang serye niya sa nagsasabing sobrang daring nga raw ito na may pagka-bold na.
"Hindi naman. Hindi naman siya bastos. Kasi, kung bastos siya or sexy, ika-cut na ng MTRCB [Movie and Television Review and Classification Board], siyempre, bago namin ito ipalabas sa TV, mauuna muna ang MTRCB, and for the record, wala silang na-cut. Lahat naaprubahan.
"May story siya, drama. Actually, this week, puro drama na. Na-rape na siya, nangyari na lahat ng tragedy, so, puro drama na ito."
Na-feel niya ba na kahit paano, "made" na rin siya because of Eva Fonda?
"Hindi pa...gusto ko pa ng another project like movie. Yung puwede ko pang patunayan na kaya kong gawin kahit na ano, gusto ko pa."
Okey na ba sa kanya na nalilinya na talaga siya sa mga sexy roles and movies?
"Okey lang...kahit saan ako mahilera. At least, hindi ako nai-stuck sa comedy lang or sexy lang. At least, versatile."
DENNIS TRILLO. Nagulat na lang si Cristine na may isyu raw pala na peke lang ang naging breakup nila ni Dennis Trillo at silang dalawa pa rin daw.
"Hindi ko nga alam bakit may ganoon. Sino ba ang nagsasabi? Para sa akin kasi, ang tagal na ng isyu. Sana, huwag na lang nilang ibalik."
September pa raw nang mag-break sila.
"Sana lang talaga, huwag nang ibalik yung ganoong isyu kasi, pareho na kaming okey, di ba? Never na rin kaming nagkita at saka, malabo na rin siguro dahil nasa ABS na ako."
Wala na ba si Dennis sa puso niya?
"Wala na..."
May pumalit na ba rito?
"Wala pa," natatawa niyang sabi. "Niloloko nga nila ako, parang hindi raw ako. Pero at least, di ba? Kahit walang love life, happy naman sa career."
Hindi nga kaya ganoon yun?
"Ganun? Tingnan natin, hindi naman porke marami akong blessing sa career, hindi ko sinasadya na huwag akong mag-boyfriend. Nagkataon lang talaga."
Pero may mga manliligaw?
"Hindi sila yung nanliligaw na consistent. Pero ayoko rin, e. Ayoko ng text-text, kaya nagbago ako ng number, e."
KAPAMILYA SUITORS. Meron daw dalawang sikat na young actors from Kapamilya network na patuloy siyang tine-text.
"Oo, pero, ayokong mag-name. Bahala sila."
Dugtong pa niya, "Nagpalit na ‘ko ng number. Saka hindi rin naman ako nagre-reply kapag nagte-text sila."
Bakit naman?
"Kasi ayoko, e, ayoko na muna...Kaya kapag nagkasalubong kami, sinasabing ‘Tinext kita.' Sinasabi ko na lang, ‘Oo nga.' Kunwari na-receive ko pero hindi ko na lang sinasabing nag-iba ako ng number."
Hindi rin daw gusto ni Cristine yung isang young actor na nagte-text sa kanya dahil may girlfriend na ito.
"May girlfriend na yung isa. Ayoko ng ganoon, di ba? Yung isa naman, hindi sa ayoko sa kanya, pero, ayoko muna kasing makapag-ano ngayon... E, yun pa nga, sabi ko dati, crush ko. Pero ganoon ako, kapag nandoon na, ayoko na," natatawa niyang sabi.
BREADWINNER? Ayaw naman sabihin ni Cristine na siya na ang breadwinner ng pamilya, lalo pa't maganda ang nagiging takbo ng career niya ngayon at consistent ang mga projects niya. Bukod sa mga TV projects niya, siya rin ang image model ng Fiona at Mint.
Aniya, "Tumutulong, siyempre. Kailangan ko rin naman tumulong dahil kumikita na rin naman ako. Minsan, ako na ang sumasagot sa ibang gastusin. Binibigyan ko ng monthly allowance ang mommy ko.
"'Yung mga kapatid ko, kung may kailangan sila at hindi nila kaya, nag-aabot ako. Sa lahat ng gastos sa bahay, ako na rin in a way."
WANTS TO BE VI. Sa ngayon, marami pa raw siyang gustong ma-achieve.
"Sabi ko nga, tingin ko naman, nagsisimula pa lang ako. Siyempre, gusto kong maging respetadong artista. Yung maging aktres katulad ni...Siyempre, ang hirap nang ma-attain yung narating ni Ms. Vilma Santos, pero, lahat naman nilu-look-up siya.
"Ang sa akin lang, gusto ko yung maging ganoong klaseng status."