Binigyang-linaw ni Direk Bobot Mortiz, business unit head ng Wowowee, ang isyu na luma, repossessed at may occupant pa ang napanalunang house and lot ng isang contestant sa afternoon variety show ng ABS-CBN (click here to read related article).
Sa radio program nina Ogie Diaz at Fernan de Guzman na Wow! Ang Showbiz! sa DWIZ noong Huwebes, February 26, ipinaliwanag ni Direk Bobot sa isang phone interview na nagkaroon ng lack of coordination sa pagitan ng winner na si Nena Santos at ng Globe Asiatique, ang sponsor ng house and lot.
"Dumiretso kasi do'n sa place yung winner," pahayag ni Direk Bobot. "At mali yata ang napuntahan nilang bahay."
Pero aminado rin naman si Direk Bobot na nagkaroon din ng pagkukulang sa parte ng Wowowee.
"Pagkabigay kasi nung susi [ng bahay] sa winner [during the show], ang bahala na after nun, yung Globe Asiatique. Pero inaasikaso na namin yun na maayos na lahat."
Nagkausap na rin daw ang winner at ang Globe Asiatique para agad na masolusyunan ang isyu. Nilinaw din ni Direk Bobot na hindi fully-furnished tulad ng ipinakikita nila sa show ang prize nilang house and lot.
"Model units lang yung ipinakikita namin. Do'n kasi, kumpleto na yung ipinakikita, pero hindi yun ang eksaktong premyo," saad pa ni Direk Bobot.
Pero sa mga susunod na araw daw ay ang actual na house and lot na premyo na ang ipakikita nila sa Wowowee. Dagdag pa ni Direk Bobot, "Sa pagkakaalam ko, nagkakahalaga yun ng 800 thousand to 1.5 million [pesos]."
Naikuwento rin ng direktor na nang makarating nga raw kay Willie Revillame ang isyu ay nagalit ang TV host. "Agad niyang ipinaayos yung problema. Alam n'yo naman si Willie, ayaw niya ng ganyan sa show niya. Baka nga abonohan pa niya 'yan," biro pa ni Direk Bobot.
Patuloy niya, "Saka hindi naman gagawin 'yan ng Wowowee. Ayaw naming masira kami nang dahil lang d'yan. Hindi rin naman sisirain ng Globe Asiatique ang pangalan nila. Marami na silang ipinamigay na bahay."
Ang kumpanya ang sponsor din ng Pinoy Big Brother at Pinoy Dream Academy sa mga papremyo ng shows ng house and lot at condominium units.
Sa huli, siniguro ni Direk Bobot na brand new ang mga ipinamimigay na house and lot sa Wowowee.