Bago pa man naibaba ang desisyon ng korte na nagpapawalang-bisa ng kasal nina Kristine Hermosa at Diether Ocampo, balita na ang sobrang closeness ng aktres kay Oyo Sotto. Tuloy, marami ang nag-iisip na baka nga boyfriend na ni Kristine ang anak nina Vic Sotto at Dina Bonnevie; lalo pa't bukas na rin naman si Diether tungkol sa bagong girlfriend niya na si Rema Ostwani.
Sa isang hiwalay na interview, sinabi ni Diether na dumating sila sa puntong sinubukan nila ni Kristine na i-save ang kanilang relasyon. Pero wala ring kinapuntahan ang lahat at ngayon ay parte na lang ng nakaraan ang anumang pinagsamahan nila.
Hindi naman itinago ni Kristine sa PEP (Philippine Entertainment Portal) na nasaktan siya, ngunit nagsilbing eye opener din sa kanya na tanggapin na wala na talagang pag-asa pa ang relasyon nila ni Diether.
"Hindi ko made-deny na, yes, oo naman, painful. But sa kanya na mismo nanggaling na past na ako sa kanya. Para ano pa ang reason ko para mag-hold on or mag-cling sa idea na puwede pa? Para sigurong ito na yung time for me to move on, gumising ka na.
"Ang tagal din naming trinay na i-save yung relationship, but wala lang yata talaga. It's not meant [to be], siguro talagang hindi kami. But I won't deny na isa siya sa malaking part, malaking part ng buhay ko, at hindi na siya mabubura sa puso ko," pahayag ni Kristine.
Alam ni Kristine na ang pagiging bukas ni Diet sa relasyon nila ni Rema sa publiko ay pahiwatig na seryoso talaga ito sa bagong karelasyon. Nasaktan ba si Kristine sa ginawa ng kanyang ex?
"Kitang-kita ko naman, magbubulag-bulagan pa ba ako?" reaksiyon niya. "Kilalang-kilala ko naman si Diet. Hindi siya mag-i-introduce ng someone if hindi totoo ang nararamdaman niya sa tao at kung hindi siya proud dito. Hindi na ako na nahe-hurt sa ganyan, medyo tapos na ako dun."
STILL FRIENDS. Sa kabila ng pag-aakala ng iba na sila na ni Oyo, sinabi ni Kristine na magkaibigan lang sila. Aminado si Kristine na ang kinauwian ng relasyon nila ni Diether ang isa sa pumipigil sa kanya para pumasok sa bagong pakikipagrelasyon.
"For sure, that's one. But aside from that, hindi pa ako ready. Hindi pa talaga. So, ang hinihintay ko lang talaga ay yung time na okay na okay na ako, at naiintindihan naman niya [Oyo] yun.
"Wala kaming label, ayaw naming maglagay ng label. But, okay na okay kami. Siya yung pinakamalapit na lalake sa buhay ko. We're really good friends. Siya yung nakasama ko sa hirap at ginhawa nung mga oras na kailangan ko ng aalalay sa akin," saad ni Kristine tungkol kay Oyo.
Naging open din si Oyo sa pagsasabing pakakasalan niya si Kristine. Sasamahan din daw niya ang aktres pag dinalaw nito ang buong pamilya na nasa Canada na ngayon. Ano ang masasabi ni Kristine dito?
"Regarding sa pagdalaw sa Canada, wala pa naman kaming napag-uusapan na ganun. But ako, definitely, dadalawin ko ang family ko dun. Pero hindi ko alam kung makakasama siya. Lahat naman, open kung sino ang pwedeng sumama. Pero wala pa naman kaming napag-uusapan kung sasama nga siya.
"Diyan sa pakakasalan daw niya ako, wow naman! I'm glad kasi gusto akong pakasalan, hindi ako pang-fling or pasttime lang," nakangiting sabi ni Kristine.
PART OF THE FAMILY. Isa si Kristine sa kinuhang ninang ng anak ng kapatid ni Oyo na si Danica Sotto at sa asawa nitong si Marc Pingris. Ayon kay Danica, forever na raw ang koneksiyon nila ni Kristine.
"Nakuha na niya akong ninang, matagal na," banggit ni Kristine. "Definitely, that's forever. Ako naman, nakakapagbitaw ako ng salitang forever pag gusto ako ng isang tao, pag ina-accept niya ang friendship ko.
"Sa kanila naman nanggaling na sobrang love nila ako at forever friends na. Wala akong reason to say no at tanggihan yun dahil, sa totoo lang, napakabuti nilang mga tao at mababait sila sa akin."
Sa interviews naman ni Ms. Dina Bonevie, sinabi niyang boto siya kay Kristine para sa anak. Taliwas sa mga lumabas na balita before na hindi nito gusto ang aktres para ka Oyo.
"Si Ms. D naman, hindi ko alam kung totoo bang ayaw niya sa akin before. Kasi wala naman siyang ipinapakita na hindi maganda sa akin. So, ang hirap magsalita na hindi niya ako gusto, kasi wala nga siyang ipinapakitang masama.
"Nagugulat nga ako pag tinatanong ako ng ibang tao. 'Hindi ka ba natatakot kay Ms. D? Hindi ka ba nate-tension pag kaharap mo siya?' Ang sinasagot ko, hindi. Siguro dahil totoong tao siya kaya natatakot din ang ibang tao sa kanya. E, totoong tao din naman ako. Pareho kaming prangka kaya siguro nagustuhan namin ang isa't isa. Sa totoo lang, napamahal na sa akin ang buong family ni Oyo," pagtatapos ni Kristine.