Sa susunod na Linggo, January 17, ikakasal na si Ciara Sotto sa longtime boyfriend niyang si Joe Oconer sa Manila Polo Club. Namataan sila ng PEP (Philippine Entertainment Portal) kagabi, January 10, sa premiere ng pelikulang SpEd Hearts sa Gateway Mall. Tampok sa naturang pelikula si Ciara bilang isang Special Education teacher.
Ayon kay Ciara, tungkol sa kanyang role sa pelikula, "Hindi ako nahirapang makihalubilo sa mga ganoong klaseng estudyante dahil nagkaroon ako ng chance na makapagturo noon sa OB Montessori. Mahilig ako sa mga bata. Parang kaedad ko lang sila. Close to my heart ang role ko sa movie.
"Nakakatulong ka rin sa pagiging aware ng mga tao through this movie, na kailangang maging mapagpasensiya tayo sa mga gaya nila. Intindihin natin sila na parang mga normal pa rin. Kailangang maging disiplinado ako at normal pa rin kahit na may mga problema, kahit nahihirapan ako sa behavior ng mga bata. Yun ang challenge ng role, and the most difficult part of it."
Maganda nga ang pinagdaanang ito ni Ciara in preparation for marriage.
"I think so!" natatawang sabi niya. "Good training talaga, mula pa noon sa school. Sa bahay rin namin, marami talagang kids. Yung mga pamangkin ko, inaalagaan ko.
Dagdag niya, "Exciting ang pagpapakasal. Pero na-realize ko, gaano man katagal ang preparation at pagpaplano, may mga nakakalimutan pa rin, may konting stress palagi. Thankful lang ako that my family is with me. Big help talaga sila. Nakakakaba lang dahil marami pang maliliit na detalyeng dapat pagtuunan din ng pansin para sa wedding."
In full support palagi ang pamilya ni Ciara, pati na sa surprise ng Eat Bulaga! sa kanya last Saturday, January 9.
"I can't get over it," aniya. "Nagpapasalamat ako na may pamilya akong ganyan, bukod pa sa mga kaibigan na hindi ako iniiwan kahit ano pa ang mangyari."
MAMA'S LITTLE DARLING. Sobrang pag-iyak na nga ng ina niyang si Helen Gamboa dahil sa pagpapakasal niya.
"Happy naman siya na magpapakasal na ako, pero painful sa kanya yung mapapahiwalay na ako sa kanya," sabi ni Ciara. "In-assure ko naman kay Mama, physically lang, pero walang mababago sa relasyon namin bilang mag-ina. Lagi pa rin akong nandiyan para sa kanya.
"Lahat ng mga tao, sinasabi sa akin, nakakaiyak naman ang mga sinasabi ng mama ko sa pagpapakasal ko. Pero this is a way for me to love her more definitely. Ngayon ko na mararanasan kung anong klaseng paghihirap yung napapagdaanan niya noon sa pagpapalaki sa amin, kung magkakaanak na ako eventually, o sa mismong pag-aasawa na lang.
"Magiging wife na ako, and a mother, if I will be blessed with kids. Anyway, wala pang honeymoon. Kailangan naming mag-save ni Joe ng pera para sa condo na titirhan talaga namin, na para sa amin. Sabay kasi yung wedding at pagpapagawa ng condo. After the elections na lang, because my dad [Tito Sotto] is running for re-election. Gusto ko ring makatulong sa kampanya niya.
"Definitely, after the wedding, gusto ko pa ring mag-artista. Supportive naman si Joe sa pag-aartista ko, and I don't think magiging isyu sa amin 'yan sa hinaharap," ani Ciara.