Who is Atty. Alma Mallonga?

IMAGE File Photo

Bagamat low-profile ang personal na buhay ni Atty. Alma Fernandez-Mallonga, karamihan sa kanyang kliyente ay mga negosyanteng nagmamay-ari ng higanteng korporasyon, tulad ni Antonio "Tonyboy" Cojuangco. Kilala rin si Atty. Alma sa mundo ng showbiz dahil sa libreng serbisyong ibinigay niya kay Dessa Patilan at Rod Strunk.


Tahimik ngunit matinik ang beteranang abugado na si Atty. Alma Fernandez-Mallonga, 53.

Bilang isang partner sa prestihiyosong Siguion-Reyna, Montecillo & Ongsiako law firm, siya ay madalas na humahawak sa mga kasong may kinalaman sa negosyo ng mga bigating korporasyon dito sa bansa.


Si Atty. Mallonga ay founding member din ng Womens Legal Bureau, isang non-government organization na nakabase sa Diliman, Quezon City, na nakatutok sa mga kasong kinahaharap ng kababaihan.


CORPORATE CLIENTS. Ayon sa website ng pinaglilingkuran niyang law firm, ang field of expertise ni Atty. Mallonga ay civil, criminal, at corporate litigation.

Siya ang nagsilbing legal counsel ng ilang bigating korporasyon sa Pilipinas.

Kabilang sa mga ito ang sumusunod: San Miguel, Philippine Airlines, PLDT, Makati Medical Center, The Landmark, Cardinal MRI Center, Dole Philippines, Nestle, at Zuellig.

Nabanggit din sa website na karamihan sa mga hinahawakan niyang kaso ay may kinalaman sa corporate take-over, intra-corporate disputes, insolvency, medical malpractice, bouncing checks, libel, estate settlement, family relations, aviation liability, torts and damages, land titles and registration, contractual interpretation and breach, at labor law.

TONYBOY COJUANGCO. Bilang isa sa mga partner ng Siguion Reyna, Montecillo & Ongsiako law firm, pangunahing kliyente ni Atty. Mallonga ang business tycoon na si Antonio Cojuangco Jr., o mas kilala bilang Tonyboy.

Si Tonyboy ang longtime partner ng aktres na si Gretchen Barretto.

Ang beteranang abugado ang humawak sa mga legal proceedings na may kinalaman sa Philippine Long Distance Telephone (PLDT) Company, noong ito ay pagmamay-ari ni Tonyboy.

Bukod dito, si Atty. Mallonga rin ang nagsilbing legal counsel ni Tonyboy nang madawit ang pangalan ng bilyonaryong negosyante sa nabigong coup attempt laban sa administrasyon ni dating Pangulong Gloria Macapagal-Arroyo, noong February 4, 2006.

Base sa isang ulat noon ng PEP.ph (Philippine Entertainment Portal), inakusahan ni dating Ambassador Roy Señeres na suportado umano ni Tonyboy at iba pang mga negosyante ang hakbang ng ilang military officers na bawiin ang suporta sa Arroyo administration.

ADVERTISEMENT - CONTINUE READING BELOW

Pati ang TV5 network, na pag-aari rati ni Tonyboy, ay kinasangkapan umano sa pagpapalaganap ng video footage ng pag-aalsa ng grupo ni Brigadier General Danilo Lim.

Agad namang pinabulaanan ni Tonyboy ang mga alegasyong ito.

Sa sinumpaang salaysay na isinumite niya sa NBI Special Task Force, iginiit ng negosyante, na kamag-anak ng yumaong Presidente Corazon Cojuangco Aquino, na hindi niya kailanman susuportahan ang anumang pag-aalsa laban sa mga awtoridad.

Pagkatapos makapagsumite ng kanyang affidavit ay hindi na itinuloy ang kaso laban kay Tonyboy at iba pang mga negosyante.



NESTOR ESPENILLA JR. Si Atty. Mallonga rin ang isa sa mga legal counsel ni Banko Sentral ng Pilipinas Deputy Governor Nestor Espenilla Jr., na kasalukuyang nahaharap sa kasong paglabag sa Section 3 (e) ng Republic Act 9013 o Anti-Graft and Corrupt Practices Act.

Ang naturang reklamo ay isinampa ng top executives at stockholders ng Banco Filipino sa Department of Justice noong April 2, 2011.

Kaugnay ito ng bahagi ni Espenilla, bilang miyembro ng Monetary Board ng Bangko Sentral ng Pilipinas, na isara ang Banco Filipino dahil "insufficient reliable assets" at "mismanagement" ng mga opisyales nito.

Dinismiss ang kaso sa Department of Justice noong 2012.



ROD STRUNK. Naging kliyente rin ni Atty. Mallonga si Rod Strunk, ang pinaghihinalaang mastermind sa pagpatay sa asawa niyang veteran actress na si Nida Blanca noong 2001.

Bilang defense lawyer ni Rod, sa loob ng apat na taon ay nagtagumpay si Atty. Malongga na pigilan ang nakabinbing extradition case laban sa kanyang kliyente.

Ibig sabihin, hindi napuwersang bumalik ng Pilipinas si Rod sa kabila nang patuloy na pagdinig sa kaso.

Ngunit noong July 7, 2007, natagpuang patay si Rod sa isang parking lot sa tinitirhan nito sa California. Pinaghihinalaang nag-suicide ito sa pamamagitan ng pagtalon mula sa ikalawang palapag ng tinutuluyang inn.

Hanggang ngayon ay hindi pa rin nareresolba ang kaso ng pagpatay sa popular na aktres.

ADVERTISEMENT - CONTINUE READING BELOW



DESSA PATILAN. Sa kasalukuyan, nadadawit si Atty. Malongga sa kontrobersiyang kinasasangkutan ng magkapatid na Gretchen at Claudine Barretto.

Si Atty. Mallonga ang legal counsel ni Dessa Cadillero Patilan, ang dating personal assistant (P.A.) ni Claudine, na ipinakulong ng aktres dahil sa bintang na pagnanakaw.

Sa ngayon, limang buwan nang nakakulong si Dessa, 19 taong gulang, sa Philippine National Police (PNP) Detention Cell Center sa Marikina, at walang inirekomendang piyansa ang pulisya upang ito ay pansamantalang makalaya.

Sa kabila nito, pinandigan ni Dessa na walang katotohanan ang ibinibintang sa kanya ni Claudine.

Sa tulong ni Atty. Mallonga, naghain si Dessa ng reklamong paglabag sa Article 308 ng Revised Penal Code of The Philippines, o Theft, laban sa dating among si Claudine, noong September 11.

Noong araw daw na pinapulis ni Claudine si Dessa, hinalughog nito ang kanyang mga gamit, at bagamat walang nakuha roong pagmamay-ari ni Claudine, kinuha umano ng huli ang cellphone at iba pang gamit ni Dessa.

Kasalukuyan pa ring dinidinig ang kani-kaniyang reklamo sa korte.

Nadawit ang pangalan ni Gretchen nang sinabi ni Atty. Mallonga na totoo ngang ang nakatatandang kapatid ni Claudine ang nagsabi sa kanya tungkol sa kaso ni Dessa.

Ngunit, paglilinaw ng abugada, mula nang tinanggap niyang kliyente si Dessa, siya lang at ang kanyang legal team ang tanging namamahala sa kaso.

Wala raw lugar sa kaso nila si Gretchen.

PRO BONO WORK. Si Dessa ay pro bono client ni Atty. Mallonga. Ibig sabihin, walang bayad ang pagbibigay-serbisyo nito bilang abugado.

Ang serbisyong pro bono ay hindi na bago para kay Atty. Mallonga at sa Siguion-Reyna, Montecillo & Ongsiako Law Firm.

Napag-alaman ng PEP na noong taong 2011 at 2012 ay nagbigay ng libreng serbisyo si Atty. Mallonga sa Radio Veritas, bilang radio host ng programang Magkabiyak Sa Batas, kasama ang asawa niyang si Atty. Eric Mallonga.

Sila ay nagbigay ng libreng legal advice kaugnay ng mga kasong isinasangguni ng radio callers.

ADVERTISEMENT - CONTINUE READING BELOW

Special interest ni Atty. Mallonga ang family law cases, na may kinalaman sa custody, support, annulment, at property settlements.


PRO BONO FAMILY CASES & RAPES OF MINORS. Napag-alaman din ng PEP na ang karamihan sa pro bono cases na hinawakan ni Atty. Mallonga ay mga kaso ng pamilya at kaso ng panggagahasa sa mga menor de edad.


Ang isa sa mga naunang pro bono rape cases na hinawakan ni Atty. Mallonga, kasama ang isang collaborating lawyer, ay dininig sa Davao. Natalo sina Atty. Mallonga rito.

Hindi kumbinsido ang hukom sa noo'y bagó-bagóng teorya ng post-traumatic syndrome, na siyang depensa nila para sa babaeng nagahasa.

Naipanalo naman ni Atty. Mallonga, sa isa ring serbisyong pro bono, ang panig ng tatlong anak na babae na naghain ng kasong "incest rape" laban sa kanilang ama.

Pinanindigan ng mga anak na silang tatlo ay sunod-sunod na ni-rape ng sariling ama.

Naipanalo rin ni Atty. Mallonga, sa isa pang pro bono work, ang rape case na ihinain ng isang nine-year-old na babae sa Makati City. Convicted ang rapist.

May naging kliyente ring pro bono si Atty. Mallonga na babaeng banyaga, na naghain ng custody case laban sa asawa, na galing sa isang prominenteng pamilya rito sa Pilipinas.

Halos walong taon ang inabot ng kaso sa korte, ngunit bandang huli ay nagwagi ang babae at nakasama rin ang tatlong anak.

Si Atty. Mallonga rin ang humawak sa sumunod na kaso ng babaeng foreigner, na hiningi sa korte ang annulment ng kanyang kasal. Granted ito.


Sa kasalukuyan, may hinahawakan si Atty. Mallonga na pro bono custody case ng isang babaeng hiniwalay sa kanyang mga anak ng mayamang asawa, at kinasuhan din ng child abuse.

Sa ngayon, may equal time nang nakuha ang babae sa kanyang mga anak, liban sa child support. Sa ngayon, dinidinig pa rin ang child-abuse case laban sa kanya.

ADVERTISEMENT - CONTINUE READING BELOW


PERSONAL LIFE. Dating magkaklase sa U.P. Law School sina Atty. Alma at Atty. Eric.

Mayroon silang tatlong anak: sina Marky, Erica, at Alexis.

Sa loob ng 27 na taong pagsasama nila bilang mag-asawa, nagtutugma ang hangarin nilang ipaglaban ang karapatang pambata at karapatan ng mga kababaihan.

Limang taon na mula nang itinayo nilang mag-asawa ang Meritxell Children's World, na nag-o-operate ng mga orpahanage, isa para sa mga sanggol at isa para sa mga batang babae.

Ang mga batang babae ay pinag-aaral nilang lahat sa pribadong paaralan, ang Infant Jesus Academy.

Ang unang grupo ng mga batang babaeng inalagaan nila ay galing sa Boys Town. Marami rito ay in-adopt sa pamamagitan ng intercountry adoption process.

Twelve babies naman na inaalagaan nila ay na-adopt na ng Filipino couples.

Sa kasalukuyan, 15 babies ang inaalagaan ng orphanage, habang inaayos ng Meritxell Children's World na maikuha sila ng tamang mga magulang.

Si Atty. Eric ay isa ring avid supporter ng Bantay Bata 163 ng ABS-CBN Foundation Inc., mula 1998 hanggang 2012.

Sa kinabibilangan niyang NGO, ang Women's Legal Bureau, nagbibigay naman si Atty. Alma ng legal counsel hanggang ngayon, kahit na sa telepono kapag gahol sa oras.



BACKGROUND. Ipinanganak si Atty. Mallonga sa Quezon City noong September 30, 1960.

Pareho nang yumao ang kanyang mga magulang, na sina Alejandro Fernandez at Feliza Dumlao.

Nagtapos siya bilang summa cum laude, sa kursong Bachelor of Science in Sociology, sa University of The Philippines (U.P.) noong 1981.

Siya rin ang itinanghal na class valedictorian nang matapos niya ang kanyang law degree sa U.P. College of Law, taong 1986.

Ang una niyang pinasukang trabaho ay sa Castillo Law Office, mula 1986 hanggang 1987.

Naglingkod din si Atty. Mallonga sa gobyerno, bilang chief technical assistant sa Senado (1987-1991), noong panahon ni Senator Santanina Rasul.

Mula 1991 hanggang sa kasalukuyan ay sa Siguion Reyna, Montencillo and Ongsiako Law Office siya naglilingkod bilang abugado.

ADVERTISEMENT - CONTINUE READING BELOW


WE RECOMMEND


FROM THE SUMMIT MEDIA NETWORK


SPONSORED CONTENT


COMMENTS

Loading comments

THIS JUST IN