Nag-level up ang pagiging professor ng award-winning documentarist at journalist na si Kara David ng GMA News and Public Affairs.
Siya ang napiling maging bagong chairperson ng Department of Journalism ng University of the Philippines (UP) College of Mass Communication.
Papalitan ng dokumentarista si Dr. Rachel Khan bilang chairperson ng departamento.
Inanunsiyo ito ng UP College of Mass Comunication Facebook page ngayong Huwebes, June 30, 2022.
Nakasaad sa post (published as is): “Maraming salamat, Dr. Rachel Khan, for serving as our Associate Dean and as Chair of the Journalism Department.
“Welcome to Asst Prof Maria Aurora Lolita Liwag-Lomibao, PhD, as our Associate Dean and Asst Prof. Kara Patria David, MA, as the Chair of the Journalism Department.”
Nagtuturo si Kara sa UP bilang assistant professor mula pa noong 2017.
Ilan sa mga itinuturo niya ay broadcast journalism, peryodismo sa Filipino, at iba pa.
Ayon sa ulat ng GMA News Online, sinabi ni Kara sa isang panayam na ang mga kanta nina Taylor Swift at Gloc-9 ang kanyang references sa pagtuturo sa kanyang mga estudyante.
Aniya, “It sticks in their heads more than if I asked them to read classic literature.
"They retain more the metaphors, personification, if I use songs as examples.”
Dagdag pa sa ulat ng GMA, nagturo si Kara nitong nakaraang taon ng masterclass on documentary filmmaking at libreng tutorial naman ng journalism at TV reporting sa mga batang nais maging journalist.
Nagsimula si Kara sa pagtatrabaho sa TV mula sa pinakababang production assistant position, hanggang umakyat nang umakyat sa pagiging researcher, writer, reporter, documentarist, host, at anchor ng mga GMA News and Public Affairs programs.
Marami na rin siyang natanggap na parangal bilang journalist at documentarist.