Nagbunga ang pagsisikap ng aktor na si Victor Neri.
Sa edad na 49, natapos ni Victor ang kanyang law degree sa University of Bohol.
VICTOR NERI'S NON-SHOWBIZ ENDEAVORS
Hindi na bago kay Victor ang lumihis ng linya sa showbiz, kung saan siya nakilala ng publiko noong 1992.
Isa ring chef-restaurateur si Victor, na Culinary Arts graduate sa Le Cordon Bleu sa Bangkok, Thailand.
Nasa level 2 naman ang skill at knowledge niya as explosive ordinance disposal technician o bomb detonator. For eight months, sumailalim siya sa law enforcement training ng The Philippine Coast Guard bomb squad. Ang level niya ayon sa isang artikulo sa The Philippines Star ay "notch lower than instructor category."
Read: Victor Neri reveals "explosive" day job
Nagtrabaho rin sa Bureau of Immigration ang aktor bilang officer sa Fugitive Search Unit ng kagawaran.
ALWAYS SEARCHING FOR NEW CHALLENGES
Nakilala si Victor bilang miyembro ng sikat na youth-oriented show na Ang TV, na napanood sa ABS-CBN noong '90s.
Kabilang si Victor sa unang batch ng Star Circle (now Star Magic) na binubuo ng up-and-coming stars ng Kapamilya network.
Hindi nagtagal ay tumalon si Victor sa action genre at dito ay gumawa at napabilang sa mga pelikulang Iskalawag: Batas ay Batas (1997), Amanos: Patas ang Laban (1997), Notoryus (1998), Birador (1998), Tigasin (1999), Suspek (1999), at Ex-con (2000).
Napanood din si Victor sa 1999 Hollywood film na Brokendown Palace, na pinagbidahan nina Claire Danes at Kate Beckinsale.
Pansamantalang nilisan ni Victor ang showbiz sa loob ng pitong taon para sumubok ng ibang career.
Naging chef si Victor at nagtungo sa iba't ibang bansa sa Asya para palawakin ang kaalaman sa pagluluto.
Taong 2014 nang bumalik sa pag-arte si Victor sa pamamagitan ng soap opera na Hawak Kamay.
Simula nun, bagama't hindi madalas, lumalabas-labas si Victor sa mga programa sa telebisyon at pelikula, kabilang ang Lavender Fields at Lolong: Bayani ng Bayan.
Nitong nakaraang eleksiyon ay tumakbo si Victor bilang mayor ng Makati City ngunit natalo siya ni Nancy Binay.