Nag-viral sa Facebook ang simpleng post ng netizen na si Bayani Allan Dimatulac tungkol sa isang lola na namimigay sa tricycle drivers sa kanilang lugar ng libreng bigas at de lata mula sa kanyang maliit na tindahan.
Nakasaad lang sa post ni Bayani noong April 3: “Ang matandang yan kakabilib nagawa niyang tumulong sa mga tricycle driver na nawalan ng pagkakakitaan!
"nagbigay ng mga pagkain galing sa kanyang sariling munting tindahan. di na niya kailangan magpa contest o pahirapan ang mga kabarangay!
"'yan ang dapat tularan! walang halong pulitika sa gitna ng kalamidad!”
Umabot na sa 111,000 likes, 201 comments, at 184,000 shares ang inani ng post na ito ni Bayani.
"MABUHAY PO KAYO, TITA CAROL!"
Nagpaaabot ng mensahe ang PEP.ph (Philippine Entertainment Portal) kay Bayani kung maaari bang isulat ang kanyang post.
Ayon sa kanya, nakita lang din niya ito sa Facebook.
Tinulungan naman niya kaming matunton ang original uploader nito.
Ibinahagi na rin pala ito sa Facebook page ng Kapuso Mo, Jessica Soho ng GMA noong March 28.
Nakalagay sa post nila: “Share your blessings.
"Kapitbahay namin si Tita Carol. 74 years old na siya.
"Napansin niyang mahirap ‘yung sitwasyon natin ngayon.
"‘Yung mga tricycle driver, walang pasada.
"Kaya naisip ni Tita at ng kanyang pamilya magbigay ng kaunting relief goods para sa mga driver, para makatulong kahit papaano.
"Lalo na ngayon na wala silang kita.”
“Mabuhay po kayo, Tita Carol! (heart emoji)"
Meron naman itong 90,000 likes, 2,300 comments, at 3,900 shares.
#SHAREYOURBLESSINGS
Ang original na nag-post tungkol kay Lola Carol ay ang netizen na si Lily Castro Mayo.
Sabi ni Lily sa kanyang post noong March 26: “Sa lahat ng tricycle driver ng Celina Homes 2 Subd. Deparo Caloocan City, mayron po kami konting relief goods po dito sa blk.7 lot 9 (Tita Carol Coronado and family) Matthew St.
"“Keep safe everyone.. (three praying hands emojis)
Pinayagan niya ang PEP.ph na ibahagi ang post niyang ito.