Si Princess Tacatac, 13, ang itinuturing na pinakabatang traditional tattoo artist ngayon sa Pilipinas.
Hindi ito nakapagtataka dahil siya rin ay taga-Buscalan, Kalinga, ang tahanan ng Pinay legendary and world-renowned traditional tattoo artist na si Apo Whang-od.
Ang Facebook Page na Tabuk Kalinga ang unang nag-post ng larawan ni Princess bilang pinakabatang mambabatok noong June 10, 2018.
Nine years old pa lang siya noon pero nakakapag-tattoo na.
Si Apo Whang-od din ang nagturo sa kanya.
Ang sining ng paglalagay ng tattoo na tinatawag na "batok" sa Kalinga ay gumagamit ng indigenous materials gaya ng tinik ng puno ng citrus na nakalagay sa kawayang patpat at tinta na nagmula sa pinaghalong charcoal at water.
Idudutdot ang tinik ng puno ng citrus sa pinaghalong charcoal at tubig, saka ipupukpok sa bahagi ng katawan ng kliyente batay sa disenyong gusto nito.
Naging popular naman sa buong mundo ang natatanging paraan ng pambabatok dahil kay Apo Whang-od.
Ayon sa post ng netizen na si Carl Taawan sa kanyang Facebook noong October 24, 2021, kasama si Princess ng iba pang kabataang tattoo artists mula sa Buscalan na lumahok sa isang tattoo event sa Baguio City.
Ibinahagi nila ang kanilang talento sa mga nais magpa-tattoo sa pamamagitan ng tradisyunal na paraan at mga disenyo ng Kalinga bilang bahagi ng pagdiriwang ng Indigenous People's Month.
Tumanggap ng mga kliyente sina Princess mula October 23-25.