Nagningning ang isang Pilipino matapos siyang kilalaning pinakamahusay na guro sa buong Jacksonville na mula sa state of Florida sa United States.
Si Charles Darwin Magdaluyo ang ginawaran ng 2022 VyStar Duval County Teacher of the Year ng annual EDDY Awards.
Ang EDDY Awards ay taunang award-giving body sa Duval County para sa mga pinakamahuhusay na teachers.
Ginanap ang awarding ceremonies noong January 22, 2022.
Kinilala si Charles bilang best of the best mula sa napiling 180 teachers mula sa iba't-ibang schools sa Duval County.
Ganito ang bungad ng isang artikulo tungkol sa award: “Out of nearly 180 teachers who were selected as the best from their respective schools, only one could be named the top educator in all of Jacksonville.”
Si Charles ay nagtuturo ng human anatomy at physiology sa Grade 9 at Grade 12 sa Jean Ribault High School.
More than three years na siyang nagtuturo sa Jean Ribault, pero seven years na ang kanyang teaching experience.
SON OF A JEEPNEY DRIVER
Proud si Charles Darwin sa kanyang simpleng pinagmulan.
Siya ay nag-aral ng Master of Arts in Science Education with specialization in General Science sa Philippine Normal University.
Nakarating siya sa U.S. sa pamamagitan ng exchange teacher program.
More than three years na siyang nagtuturo sa Jean Ribault High School.
Para kay Charles Darwin, ang edukasyon ang nagpabago sa buhay ng kanyang pamilya.
“Ang tatay ko ay jeepney driver, ang nanay ko ay part-time tutor," kuwento ng Pinoy teacher sa interview ng ABS-CBN News, February 18, 2022.
"Nakita ko talaga yung struggle nila just to raise us.
“Kaya rin sobrang pursigido kaming mag-aral at makapagtapos sa state universities, dahil alam naming 'yung hirap ng parents naming pagdating sa pag-aaral.”
Matapos ang isang taong pagtuturo sa Florida, isang brand-new jeepney ang iniregalo ni Charles Darwin sa ama.
“He has been driving for so many years and he is not driving his jeepney before, pero nung nabili ko iyon sobrang tuwang-tuwa siya.”
Para raw kahit paano ay masuklian niya ang sakripisyo ng ama.
Aniya, "rewarding" para sa kanya ang mabigyan ng kaligayahan ang ama na walang tigil sa pagtatrabaho para mapag-aral sila.
Sinusuportahan ngayon ni Charles Darwin ang kanyang kapatid na kumukuha ng medicine sa De La Salle Medical Sciences and Institute sa Cavite.
Nakatanggap si Charles Darwin ng kotse, cash prize, classroom grant, at board seat sa Jacksonville Public Education Fund Board of Directors.
Bilang ambassador, inaasahan siyang magbibigay ng mga public speeches at training sa ibat-ibang schools sa susunod na isang taon.
Lalaban din si Charles Darwin bilang 2022 Teacher of the Year sa buong Florida.