May incentive ang pagiging topnotcher!
Ginantimpalaan ng Pangasinan State University (PSU) ang dalawa sa kanilang mga estudyante ng tig-PHP100,000 cash incentive dahil sa pagiging topnotcher nila sa magkahiwalay na board examinations.
Ang dalawang estudyante ay sina Thomas Jefferson Fernando ng PSU Asingan campus, at Jason Mejia ng PSU Urdaneta City campus.
Si Thomas ay Top 3 sa ginanap na January 2022 Licensure Examination for Teachers, at may rating na 92.20 percent.
Top 3 naman si Jason sa May 2022 Licensure Examination for Civil Engineers, at may rating na 93.25 percent.
Nagpasalamat sina Thomas at Jason sa PSU dahil malaking tulong sa kanilang pamilya ang natanggap nilang incentive.
Ayon kay PSU president Dr. Dexter Buted, “Passing a board examination is a formidable feat and topping these licensure tests is an achievement extraordinaire.”
Nagkakaloob ang PSU ng cash incentives sa kanilang mga estudyante na mapapabilang sa Top 10 ng alinmang Professional Regulations Commission (PRC) examinations.
Ayon sa PSU, ito ay para makapagbigay ng inspirasyon sa kanilang mga estudyante na maging masigasig sa kanilang pag-aaral at paghandaang mabuti ang licensure examinations.