Isang meteorite ang pumasok sa Philippine atmosphere noong Mayo 20, 2022.
Bumagsak ito sa Barangay Ponggo, bayan ng Nagtipunan sa Quirino.
Lumusot ito sa two-layer na bubong ng isang bahay, at tinamaan ang isang plastic na paso ng halaman.
Dahil sa tindi ng impact, lumikha ito ng butas sa sahig na singlaki ng palad.
Nagkapira-piraso ang meteorite dahil sa matinding impact.
Pinangalanan itong Ponggo, na isinunod sa barangay kung saan ito natagpuan.
Ang "Ponggo" ang “official” na ikapitong Philippine meteorite at matagumpay nang nailista kamakailan sa Meteoritical Bulletin Database o MBD, na “primary and official source for information about new meteorites” mula sa iba-ibang bahagi ng mundo.
Ipina-publish ang listahan sa Meteoritical Bulletin, na binuo at mine-maintain ng Nomenclature Committee ng Meteoritical Society.
SEVENTH PHILIPPINE METEORITE
Ang meteorite ay 2.4 kilogram ang bigat.
Ang mga nagpa-register sa MBD ay ang collectors na sina Mar Christian Cruz, Ramon Santiago, Davin Joshua Magno at Allen Yu.
Nang pangalanan itong “Ponggo” ng collectors, humingi sila ng approval sa National Commission for Culture and the Arts.
Ganito ang deskripsiyon sa "Ponggo" o MBD, “According to the anonymous finder, he did not touch the stone right after it landed because it seemed to be too hot.
“After the impact, the people within the vicinity heard three consecutive sonic booms.”
Matapos makolekta, ipinamahagi ng nakapulot ng meteorite ang mga piraso nito sa mga kamag-anak.
Kalaunan, ang isa sa collectors—si Mar Christian Cruz—ay nakakuha ng apat na piraso ng meteorite na may kabuuang timbang na 17.71 grams.
Para sa classification at registration, ang 21.5 grams naman na piraso ng meteorite ay ipinadala sa Cascadia, ang U.S.-based meteorite research center.
Achievement ito para kay Cruz at para sa kapwa niya collectors.
“That's the first time na group of Filipinos ang nag-initiate ng registration,” ani Cruz sa ulat ng ABS-CBN News.
“Usually, kasi mga foreign scientists and collectors nagpapa-register. This can change the view of international science communities sa Philippine meteoritics.”
Dagdag ni Cruz, “Isa pang significance [is] yung awareness of proper classification and registration processes.
“Marami kasing Pinoy ang nabibiktima ng fake meteorite testings dito sa Pilipinas.
“Wala po tayong capable laboratories as of now kaya sa ibang bansa kami nagpa-test.
“Our goal here [is] to promote the meteoritics in scientific ways, not just for monetary value.”
Samantala, ang naunang anim na Philippine meteorites na officially listed sa MBD ay ang Bondoc, Calivo, Orconuma, Paitan, Pampanga, at Pantar.