Ang bayong na noon ay pinapamalengke lang, ngayon ay inirarampa na sa mga prestigious fashion shows sa ibang bansa.
Naitampok ang mga eleganteng bayong ng Bayong Canada sa New York Fashion Week (NYFW) sa U.S. noong February 2022.
Ang Bayong Canada ay isang modernized bayong business na itinayo ni April Cureg Moran noong 2021.
Adhikain ng Bayong Canada na maging world-class ang kilalang sisidlan ng mga Pinoy.
(Models carrying modern bayongs featured in the New York Times Square billboard)
Kasama ang mga produkto ng Bayong Canada sa mga modern fashion ideas na na-feature sa isang event ng NYFW.
Pareho ang materyales ng mga ito sa traditional na bayong, pero mas maliit at dinisenyo para magmukhang handbag.
Ipinakita rin sa isang billboard sa Times Square ang mga modelong hawak-hawak ang mga bayong.
Bitbit din ito ng mga modelo sa Vancouver International Film Fest fashion show ngayong taon.
(Top photo: Bayong Canada products at an event in the New York Fashion Week last February. Bottom photo: Models at the Vancounver International Film Fest fashion show)
MODERN BAYONGS
Kuwento ni April sa PEP.ph (Philippine Entertainment Portal) via email interview noong March 2, 2022, positibo ang feedback sa kanyang products sa ibang bansa.
Sabi ng Pinay entrepreneur, “Our bayongs kasi nag-evolved na siya, e. It can be for millennials or let's say for all ages. It is trendy and well-made.
“Kung tutuusin, ang bayong ay napaka-common sa atin, and nang makita nila dito, they were amazed sa ganda and quality nito.
“At siyempre pa, ang price niya sobrang affordable, kumpara sa iba.”
Ibinahagi rin ni April kung bakit bayong ang napili niyang ibenta.
“I want to pass the legacy to every generation, na ipakita sa mundo ang galing nating mga Filipinos.
“Gusto ko makita na ang produktong Pilipino ay nasa world market. At naniniwala ako na kaya natin makipagsabayan sa iba.”
Itinayo niya ang Bayong Canada noong 2021, unti-unti nang umuunlad ang kanyang business.
“I have resellers all over Canada then we also have in other parts of USA, Norway, Australia, Italy. Then papasok ngayon ang New Zealand,” sabi ni April.
(Models holding modern bayongs at the Vancouver International Film Festival fashion show)
MORE THAN JUST MONEY
Para kay April, ang Bayong Canada ay hindi lang isang negosyo kundi isang paraan na makatulong sa weaving industry sa Pilipinas.
“The promotion of our products and sa support natin sa mga nangangailangan, lalo na sa mga weavers natin, na nasu-sustain natin ang kanilang kabuhayan,” sabi ni April.
“I also want to support our weavers back home, to sustain their kabuhayans and to give them hope and pride.”
Ang mga bayong products ni April ay handwoven ng mga komunidad sa Pilipinas.
“I have eight communities na sinusuportahan sa Philippines for our bayong,” sabi ng entrepreneur na ang mga lugar na tinutukoy ay Samar, Negros Occidental, Negros Oriental, Bicol, Iloilo, Davao del Norte, Laguna, at Manila.
May mga charity works din si April sa Pilipinas, katulad ng feeding programs at pagpapatayo ng library sa schools.
“I want to give back kung ano ang nakukuha ko ngayon, and I do believe that giving is contagious.”
Si April ay medical representative sa Pilipinas for 10 years, habang ang kanyang asawa naman ay nagtatrabaho sa Canada.
Noong 2014, si April at kanilang mga anak ay pinetisyon ng kanyang asawa.
Pagdating sa Canada, nagtrabaho muna si April bilang medical office assistant for three years.
Noong December 2019, sinimulan ni April ang pag-i-import ng mangilan-ngilang bayong mula sa Pilipinas.
Naging mabenta ito hanggang sa nagdesisyon siyang full-time na tutukan ang negosyong Bayong Canada noong nakaraang taon.