Aliw na aliw ang netizens sa pagkahilig ni Thylane Katana "Tili" Bolzico sa taho.
Maraming social media posts ang celebrity couple na sina Solenn Heussaff at Nico Bolzico tungkol sa paboritong taho ng kanilang two-year-old daughter.
Sa isang video ni Nico kung saan makikitang kumakain ng taho si Tili, ganito ang caption ng Argentinian businessman: "Tell me your daughter is Filipina without telling me your daughter is Filipina."
Mula pa noong nakaraang taon, madalas mag-post sina Solenn ng videos ni Tili na sumisigaw pag tinatawag ang magtataho na si Kuya Henry.
Minsan ay hinahanap pa niya ito sa kalsada sa loob ng village.
Nakatutuwa rin kapag ginagaya ni Tili ang magtataho sa pagsigaw ng “Taho!”
Tuloy, kilalang-kila ng mga followers ng mag-asawa si Kuya Henry.
At ngayon ay mas dumami ang nakakakilala sa magtataho dahil umabot na sa news programs, online media, at social media ang pagkahilig sa taho ni Tili.
TILI'S SUKI TAHO VENDOR
Kinilala ang magtataho bilang si Henry Leonardo, ang kinomisyong maglako ng taho sa exclusive village na kinaroroonan nina Solenn.
Sa interview ni Henry sa GMA Public Affairs noong February, nagkuwento siya kung paano siya napadpad sa isang exclusive village sa Taguig para maglako ng taho.
“Dati po akong vendor sa Fort Bonifacio. Ngayon po, yung isa sa anak po ng suki ko roon, na-discover po yung McKinley Hills. ’Tapos, nagka-village at naging president po siya roon ng homeowner’s [association].
“Ngayon po, nagmeeting po sila. Nag-request na mayroong magtinda ng taho doon at balot.”
Si Henry ang kinuhang maglako ng taho sa village.
Paano naman niya naging suki ang anak ni Solenn?
“Dumadaan po ako sa tapat ng bahay nila. Yun nga ho, sumisigaw ako ng, ‘Taho!’
“Nagustuhan siguro ng bata yung pagsigaw ko, ginaya niya po.
“Sina Sir Nico naman, Ma’am Solenn, pinatikim po nila yung taho. ‘Tapos binigay po nila yung taho.
“E, nagustuhan po siguro ng bata. Kaya yun, minsan hinahanap-hanap niya po ako.”
Biro pa nga ni Henry, natuto siyang mag-Ingles dahil sa pakikipag-usap kay Tili at iba pang suki.
“Maraming napupulot na English words sa mga suki na Inglisan, kaya nabihasa na rin ako sa pagsasalita,” nangingiting sambit ng tindero.
Sa social media account nga ni Henry ay bida si Tili na tinatawag niyang “idulo.”
(Tili with her suki taho vendor Kuya Henry.)
Malaking tulong naman sa kabuhayan ni Henry ang pagtitinda ng taho dahil umaabot ng PHP2,000 ang benta niya kada araw.
Ito ang pangunahing kabuhayan niya simula pa noong 2016, para pantustos sa pamilya.