Marami sa ating mga Pilipino ay pamilyar at mahilig sa street food.
Ilan sa mga tanyag na street food ay fish balls, squid balls, chicken balls, kikiam, kwek-wek, at ngayon ay may crab sticks na rin.
Pero paano ba ginagawa ang mga ito? May sustansiya bang nakukuha mula sa mga ito?
Kung ikaw ay madalas kumain ng street food, importanteng malaman kung ito ba ay nakabubuti para sa iyo.
Ito ang naging paksa ng Olympic nutrition coach na si Jeaneth Aro sa kanyang February 2025 YouTube video.
Maganda bang gawing protein source ang street food, tulad ng fish balls, kikiam, at crab sticks?
Read: Iced coffee hacks you can do at home
NUTRITIONIST ON HOW STREET FOOD IS MADE
Paliwanag ni Aro, ang fish balls ay gawa sa ladyfish o bidbid sa Tagalog.
Ginigiling ang fish meat at pagkatapos ay hinahaluan ng harina, itlog, asin, additives, at flavorings.
Ang kikiam naman ay giniling na seafoods—isda, hipon, at pusit at hinahaluan ng flour at mga pampalasa.
Ang imitation crab meat o crab sticks naman ay gawa sa surimi paste.
Ayon sa ilang food and science websites, ang surimi paste ay mula sa processed seafood products, tulad ng isda na ginigiling at hinahaluan ng mga pampalasa para ma-achieve ang paste texture.
Ang crab sticks ay gawa sa surimi paste na hinahaluan ng harina, egg whites, asukal, asin, at iba pang sangkap para ma-achieve ang crab-meat taste.
Kapag nakamit ang lasa ng mga produktong ito, saka huhulmahin para sa kanilang hugis: bilog para sa fish balls, at pahaba para sa kikiam at crab sticks.
Ang paraan naman ng pagluluto sa mga ito ay pagpapakulo, steaming, at pagprito na siyang pinaka-popular.
Read: Surprising scoop: Halo-Halo is not originally Filipino?
PROTEIN CONTENT
Ang tanong: sapat ba ang protein at nutrition ng mga pagkaing ito para mapunan ang nutritional daily needs ng ating katawan?
Ibinahagi ni Aro ang protein at calorie content ng street food sa bawat 100 grams.
Ang fish balls ay may 121 kcal at 8.6 grams ng protein.
Ang kikiam ay may 121 kcal at 8.6 grams ng protein.
Ang crab sticks naman ay may 95 kcal at 7.7 grams ng protein.
Di hamak na mababa ang calorie at protein contents ng mga pagkaing ito kumpara sa natural protein sources tulad ng karne ng isda, chicken, pork, at beef.
Halimbawa, ang isda ay may 117 kcal at 23g ng protina per 100 grams.
Ang chicken, beef, at pork ay may 137 kcal at 27g ng protina kada 100 grams.
Ayon sa isang Harvard article, ang recommended dietary allowance para sa protein ay tinatayang 0.8 grams ng protein per kilogram ng body weight, o 0.36 grams per pound.
PROS AND CONS OF STREET FOOD
Binanggit ng registered dietitian na si Aro ang positibo at negatibong mga naidudulot ng pagkain ng street food.
Walang dudang ang mga ito ay abot-kayang bilhin, at madaling i-prepare.
Subalit tinawag niyang “poor quality protein” ang mga ito dahil sa may halong extenders at fillers kung ikukumpara sa tunay na karne.
Mataas din ang sodium content ng street food na puwedeng magdulot ng high blood pressure kapag nasobrahan.
Mataas din ang additives at preservatives ng mga ito na mga artificial ingredients na puwedeng magdulot ng hindi magandang reactions sa katawan.
Sa madaling sabi, hindi magandang gawing alternative ang street food para maging protein source.
Tandaan ding kadalasan ay piniprito ang mga ito, at ang sobrang pagkain ng fried food ay may koneksiyon sa heart disease at obesity.
“Moderation is key,” ani Aro ukol sa pagkain ng street food tulad ng fish balls, kikiam, at crab meat.
Mas mainam pa ring gawing protein source ang tunay na karne tulad ng isda, pork, chicken, at beef.