Mula sa kanyang mapagkumbabang pagsisimula at unang trabaho bilang miyembro ng service crew ng Tia Maria’s Mexican Restaurant hanggang maging popular siyang artista at restaurateur, malayo na ang narating ni Marvin Agustin.
Naranasan ni Marvin noong 1995 maging waiter, bartender, kitchen help, cashier, at sa sariling salita niya, sekyu at janitor, sa nabanggit na restaurant.
Noong 2023, binuksan ni Marvin sa Bonifacio Global City ang Cochi, ang kanyang Spanish at Filipino restaurant na ginawaran kamakailan ng karangalang Bib Gourmand ng Michelin Guide Philippines.
Ang pagkilalang natanggap ng kanyang restaurant mula sa Michelin Guide Philippines ang rason para lalong magkaroon ng kabuluhan ang pagiging restaurateur ni Marvin.
Read: Morning Sun Eatery owners, hindi pamilyar sa Michelin Guide
Ibinahagi ng actor-restaurateur sa PEP.ph (Philippine Entertainment Portal) ang kaligayahang nararamdaman dahil sa natanggap na parangal.
Saad niya: “Honestly, hindi ko talaga ini-expect.
"Dati, pinapanood ko lang sa mga documentary yung mga restaurant na nare-recognize ng Michelin. At tuwing pinapanood ko yon, ang nararamdaman ko ay pride para sa kanila.
“Never ko naisip na mangyayari ito sa amin, kaya hanggang ngayon parang unbelievable pa rin. Pero ang totoo, sobrang saya namin.
"The entire team, the chefs, and our whole crew were very, very happy. Kasi hindi lang ito para sa akin, kundi para sa lahat ng nagtatrabaho araw-araw sa Cochi.
"This recognition is a beautiful reward for everyone’s hard work and love for what we do.”
FUNNY ANECDOTE ABOUT EMAIL FROM MICHELIN GUIDE
May nakakaaliw na kuwento si Marvin tungkol sa muntik nang pagbabalewala niya sa email na ipinadala ng mga namamahala sa Michelin Guide Philippines.
Lahad niya: “Nung una, akala namin scam!
"Our manager opened the email and nung nakita niya may link to click, sabi ko, ‘Huwag mo munang i-click! Baka phishing yan.’ Kaya dalawang araw lang siyang nakatambay sa inbox namin.
“Hanggang sa naisip ko, ‘What if legit nga?’
"So, tinanong ko yung chef friends ko abroad, at sabi nila, legit daw talaga yung email ng Michelin.
“Dun kami sobrang natuwa — from thinking it was a scam to realizing na totoo pala.
“Tapos, after that first email asking for more info and photos, dumating yung second email inviting us to the awarding ceremony.
“Dun na ako naiyak. Nung i-share ko sa team, lahat kami umiyak. Tears of joy talaga.”
Nakaramdam daw ng kaba si Marvin habang nagaganap ang inaugural restaurant selection ceremony ng Michelin Guide Philippines sa Manila Marriott Hotel, Pasay City, noong Oktubre 30, 2025.
Kuwento niya: “During the ceremony, nung tinatawag na yung awardees alphabetically at lumagpas na sila sa letter C, tahimik lang ako.
“Akala ko nakalimutan ako. May friend pa akong lumapit na awardee. Sabi ko, ‘Wala, e,’ sabay lungkot.
“Tapos sabi niya, ‘Baka Bib Gourmand ka,’ at napangiti ako.
“And true enough, nung tinawag ang Cochi under Bib Gourmand, tuluyan na akong napaluha sa saya.”
Read: Morning Sun Eatery owner reveals secret of their famous barbecue
View this post on Instagram
CLUELESS ABOUT VISIT OF MICHELIN INSPECTOR
Pinipili ng Michelin Guide ang mga restaurant na kanilang pararangalan sa pamamagitan ng mga hindi nagpapakilalang inspektor na nagbabayad at tinitikman ang mga pagkain sa mga kainang pinupuntahan nila.
Gaya ng ibang mga restaurant na ginawaran ng Bib Gourmand ng Michelin Guide Philippines, walang kamalay-malay si Marvin na may inspektor na nagsadya at kumain sa Cochi.
“Hindi talaga. We never thought that any Michelin inspector would actually step inside our restaurant,” sabi ni Marvin.
“I train our team halos every week. Minsan nagsisimula kami ng 7 A.M., kasi yun lang yung oras na mako-convene ko ang lahat ng front-of-house at ilang leaders from the kitchen, from all our restaurants, in one space.
“Ginagawa namin ito para mapaganda pa lalo ang hospitality game namin at ma-serve nang maayos ang bawat guest, pero never naming naisip na may Michelin inspector na darating.
“We just always try to give our best to every person who walks through our doors — breakfast man yan, lunch, merienda, or dinner.
“Kung anuman ang naramdaman nila sa amin, maybe it’s the sincerity that we truly appreciate, every guest who chooses to spend their time and money with us.
“Hindi namin alam kung iyon ang nakita nila, pero what’s certain is that we’ve always been genuinely grateful for every customer who comes to Cochi.”
Gaano kahalaga kay Marvin ang pagkilalang ibinigay ng Michelin Guide Philippines sa Cochi?
Tugon niya: “Mahalaga siya, of course, pero higit pa sa award, validation siyang tama yung puso at direksiyon namin.
“Yung sincerity sa bawat luto, sa bawat detalye. Hindi lang para sa Cochi, kundi para sa buong F&B community ng Pilipinas.
"Kasi ibig sabihin, kaya rin nating makilala sa mundo gamit ang sariling lasa at kuwento natin bilang mga Pilipino.”
Read: Which country is the biggest consumer of instant noodles?
THE SCENE AFTER RECEIVING THE BIB GOURMAND DISTINCTION
Ano ang eksena sa Cochi isang araw matapos nilang matanggap ang Bib Gourmand distinction ng Michelin Guide Philippines?
“Grabe! Parang celebration sa loob,” nakangiting sagot ni Marvin.
“Ang daming nagpa-reserve, ang daming bumati, pero ang pinaka-touching para sa akin ay yung staff namin.
“Proud na proud sila at mas ganadong magtrabaho. Ramdam ang energy at saya nila. Yun ang totoong reward para sa akin."
Dalawang taon pa lamang ang nakalilipas buhat nang magbukas ang Cochi at punumpuno na ito ng kuwento tungkol sa hirap, saya, at pagmamahal, ayon kay Marvin.
Pero handang-handa na raw sila ng kanyang team sa mga bagong hamon na darating.
Saad ni Marvin: "Mas mataas ang expectations siyempre, pero hindi namin tinitingnan as pressure. Motivation siya.
“Mas gusto naming mag-improve, mag-level up, pero manatiling totoo sa essence ng Cochi — ang good, honest, at heartfelt food.
“Ang promise ko, hindi kami titigil sa pagbibigay ng best experience.
"Patuloy naming ibubuhos ang puso sa bawat putahe at ipagpapatuloy naming i-represent ang Filipino flavors with pride, sincerity, and passion.”
Read: Nutritionist reveals truth about white, brown, and specialty eggs
View this post on Instagram