Nakiisa ang mag-asawang Dingdong Dantes at Marian Rivera sa pagpapabakuna sa Araw Ng Kalayaan, noong Sabado, June 12.
Nakibahagi sila sa 'Ingat Angat Bakuna Lahat' campaign initiative ng Task Force T3, kunsaan kabilang ang entertainment workers at mga miyembro ng media industry sa A4 Priority Group na dapat mabakunahan.
Sa kanyang Instagram post, sinabi rin ni Dingdong na first dose ng Sinovac vaccine ang itinurok sa kanila ni Marian.
Pahayag ni Dingdong: "SINOVAXED!
"Sa linya ng aming trabaho, madalas ay kailangan magshoot sa labas. Kapag sasabak na sa eksena, mask-off. Kailangan naming tanggalin ang aming first line of defense sa COVID-19.
"Kaya ngayong Araw ng Kalayaan, gusto naming magpasalamat sa Ingat Angat at sa lahat ng ating frontliners dahil ngayon din nagsimula ang pagbabakuna sa A4 Priority Group na kasama ang media and entertainment industry, delivery service riders, mga self-employed, at ang iba pang mga manggagawa na nakikipagsapalaran sa pagpunta sa kanilang mga trabaho."
Naniniwala ang Kapuso Primetime King and Queen na mahalaga ang magpabakuna bilang proteksyon sa kanilang pamilya.
Sabi pa ni Dingdong: "Kabado man, through research and consultation with experts, mas nagkaroon ako ng lakas ng loob para magpabakuna.
"This is my way of ensuring not only my health and safety, but also of my loved ones and my community."
CUTE PHOTOS OF DINGDONG AND MARIAN
Kalakip ng Instagram post ni Dingdong ay ilang litrato na kuha sa kanila ni Marian habang nagpapa-vaccine.
Chill lang ang actor-host na masayang itinuro ang kanyang bakuna.
Ipinakita naman ni Marian via Instagram Stories ang hawak niyang questionnaire sa vaccination center sa Taguig.
Makikitang nakapikit din ang actress-host nang turukan ng vaccine.
Pero pagkapatapos mabakunahan ay masigla at magkayakap pang nagpa-picture ang mag-asawa.
Napa-yehey pa si Marian.
Para sa mga nais mabakunahan, magtanong sa inyong local government unit para sa online form na nilalagdaan para sa registration at schedule ng pagpabakuna.
#BakunaisLife #BakunaNowNa