Sa tuktok ng bundok sa Masaraga, Oras Tabaco, Albay nakatayo ang isang simpleng bahay.
Bago makarating sa lugar, kailangan munang mag-hike ng dalawang oras.
Pero sa kabila ng kasimplehan ng bahay, sagana ito sa electric appliances: may TV, electric fan, ilaw, blender, pangkayod ng niyog, pati na grinder.
Mayroon din itong wi-fi at malakas ang Internet.
Pero ang kuryente nito ay hindi nakakabit sa kabihasnan dahil napakalayo nito.
Ang supply ng kuryente ay nagmumula sa improvised micro hydro power generator na gawa mula sa mga patapong bagay na nakuha sa junk shop.
Gawa ito ng may-ari ng bahay na si Jomar Flores, 31, na siya ring caretaker ng lupain na nasa bundok.
Ang makinang ito ang nagbibigay ng ilaw sa tahanan ni Jomar at ng kanyang pamilya.
Maliit lamang ang makina subalit kaya nitong magpa-ilaw ng sampung bahay.
Read: Abandoned train car transformed into a stunning house for PHP8.8M
Ang bahay ni Jomar ay ilang beses nang naitampok sa mga TV programs at vlogs, tulad ng KBYN ng ABS-CBN at SEFTV sa YouTube.
IMPROVISED MICRO HYDRO POWER GENERATOR
Mismong sa kabundukan na isinilang at lumaki si Jomar.
Aniya, “Masarap yung nandito kasi lahat sariwa—gulay, mga makukuha sa palibot… masarap yung hangin, malamig, at tahimik.”
At dahil sa naimbento niyang hydro power generator, enjoy ang kanyang pamilya sa modern technology.
Ang nakabibilib pa kay Jomar, wala siyang background sa engineering.
“Graduate po ako ng Grade 6,” kuwento niya.
“Nung maliit pa ako, naggawa na ako ng maliliit na hydro [machines]. Napagana lang yung Walkman, ilaw na maliliit kagaya ng lighter kasi three volts lang po iyong labas ng kuryente.
“Ngayon naisipan ko ulit na mas malaki, na kaya nang [magpagana] ng mga appliances sa loob ng bahay.”
Ikinabit ni Jomar ang kanyang makina sa ilog na malapit sa bahay. Gamit ang nilikhang makina, nako-convert niya ang water pressure ng ilog sa kuryente.
Ang generator na ito ay apat na taon nang patuloy na umaandar at tuluy-tuloy na nagbibigay ng kuryente sa bahay.
Nakaya ring gumawa ni Jomar ng ram pump na nakadikit sa kalapit batis para mag-akyat ng tubig na lalabas sa mga faucet ng kanyang bahay.
In short, ang kuryente at tubig na umaakyat sa bahay ni Jomar ay libre dahil sa kanyang mga imbensiyon.
Read: British-inspired tiny house in Bulacan is "first of its kind"
Sabi ni Jomar: “Kasi malayo, di ba, ito sa sentro kaya ako gumawa ng micro hydro, para magagamit naming pamilya sa bahay… pati na rin mga kapwa ko farmers, nakakabit na rin dito.”
Pero aminado si Jomar na natagalan din bago niya natapos ang makina. Isa-isa kasi ang pagbili ng spare parts at may mga aberya rin sa proseso habang ginagawa ito.
Ngayon ay tuluy-tuloy na ang supply ng kuryente at tubig sa kanyang munti at simpleng bahay, at na-e-enjoy pa ng kanyang pamilya ang modern technology.
Higit sa lahat, ang kuwento ni Jomar ay nagpapatunay sa abilidad ng mga Pilipino na umaangat kapag hinihingi ng pagkakataon.