Isang content creator ang lumilikha ng ingay dahil sa kakaiba niyang content—ang manira ng luxury-brand items, partikular ang bags at minsan naman ay mga sapatos.
Nagde-deconstruct siya ng mga items—binabaklas, ginugupit, pinupunit, sinusunog, at sinasabuyan ng acetone.
Sa kanyang TikTok account, ganito ang ginawa niya sa Louis Vuitton Neverfull MM Monogram Empreinte bag na worth $2,700 o halos PHP149,000; Gucci Dionysus bag na $1,100 (PHP60,000); Yves Saint Laurent Camera bag worth $1,600 (PHP88,000); at Christian Louboutin Pigalle shoes na $795 o PHP44,000.
Ang kanyang views ay umaabot sa daan-daang libo at meron ding umaabot ng mga milyon.
Pero may malalim na dahilan kung bakit niya ito ginagawa.
Hindi niya sinisira ang biniling luxury-brand items para mang-shock at makakuha ng views.
Read:
- Louis Vuitton employee receives LV bag worth PHP43,000 as Christmas gift
- Former Louis Vuitton employee gives tips how to spot fake LV bag
A LEGIT LEATHER CRAFTSMAN
Kilala siya bilang si Tanner Leatherstein sa social media.
Meron siyang 958,000 followers at higit 10 million views on Tiktok alone.
Pero ang tunay niyang pangalan ay Volkan Yilmaz, 37, isang leather craftsman.
“I’ve been deconstructing and inspecting designer luxury leather bags to help people understand if its worth it or not,” paliwanag niya sa isang YouTube video ng Insider noong February 2023.
Binubusisi niya kung maganda ang leather at pulido ang pagkakagawa o pagkakatahi ng isang designer item.
Sa katapusan ng kanyang videos, magbibigay siya ng sariling estimate kung magkano ang halaga ng nasabing item base sa material at labor.
Halimbawa, $115 o PHP6,300 ang estimate cost niya sa Gucci Dionysus bag, $160 o PHP9,000 sa Yves Saint Laurent Lou Camera bag, at PHP14,000 sa LV Neverfull MM Monogram Empreinte.
Tanner Leatherstein deconstructs a Gucci Dionysus bag
Sa isa niyang review video, may ganito siyang pahayag pagdating sa designer bags: “The price is much more of the luxury experience than it is about the quality of leather or craftsmanship.”
Sabi ni Tanner, hindi porke’t gawa sa tunay na leather ang isang item ay parang ginto na ang presyo nito.
“Then when you start to see astronomical prices, you know that it’s not about the leather anymore. It’s about the status the comes with the price.
“That’s the whole point of my question: if is it worth it or not.
“Leather is not cheap but it’s never astronomically expensive,” katuwiran ni Tanner.
Ang genuine leather aniya ay “misused term in the industry.”
Puwede raw na ang isang item ay gawa sa low-quality leather, pero ang ginagawang pagma-market dito ay nangyayari in “misleading ways.”
Paliwanag pa ni Tanner: “I try to put my estimates on the leather and craftmanship costs so people can make that deduction, like how much of this price is now status coming from the brand and make your mind by yourself, right?”
Sa kanyang pagkilatis sa leather, tatlong bagay ang kanyang tinitignan—ang uri ng leather, craftsmanship o sophistication ng design, at overall performance value kumpara sa presyo nito.
Dagdag niya, “If you’re looking for just leather, you don’t care about the status, it [referring to the price] might be too much for you.
“If you wanna buy the status that comes with the brand, then it’s totally worth it for you. So that’s my intention of helping people with this information.”
Gamit ang cutter, sinira ni Tanner ang isang Yves Saint Laurent camera bag para kilatisin kung genuine leather ito.
THE MAN BEHIND TANNER LEATHERSTEIN
Si Tanner ay mula sa isang pamilya na nagmamay-ari ng tannery, o leather factory kung saan kinukulayan ang balat ng hayop, sa Turkey.
Maaga siyang namulat sa leather industry, at nagtrabaho sa family business hanggang paglaki.
Nag-aral din siya tungkol sa leather sa China at Turkmenistan.
Taong 2009 ay nagpunta siya sa Chicago, USA, kung saan pinagsabay niya ang pagiging cab driver at MBA student sa University of Illinois, ulat ng The New York Times, January 4, 20234.
Kalaunan ay nagtayo siya ng sarili niyang leather brand na tinawag niyang Pegai.
Taong 2019 nang tutukan niya ang leather business at nagsimulang gumawa ng content.
Sa simula, gumawa raw siya ng mga video dahil maraming kaibigan ang nagtatanong kung genuine ba ang leather ng kanilang mga binibili.
Hindi raw niya inakalang maraming tao pala ang magiging interesado sa kanyang content.
Paglilinaw rin ni Tanner, hindi siya tumatanggap ng free items para mag-advertise. Gumagastos daw talaga siya nang malaki sa pagbili ng items para pagkatiwalaan siya ng mga tao sa kanyang reviews.