Maaga pa lang ay tinuturuan na ng mag-asawang Dingdong Dantes at Marian Rivera ang kanilang dalawang anak na sina Zia at Sixto kung paano pangalagaan ang ating kalikasan at kapaligiran.
Ayon kay Dingdong, bilang isang mamamayan, dapat ay mayroon tayong ambag kung paano natin mapangangalagaan ang ating kalikasan, kapaligiran, at kahit ang mga hayop sa ating paligid.
Nabanggit ito ni Dingdong sa nakaraang mediacon ng programa niyang Amazing Earth na magdidiwang ng fourth anniversary nitong buwan ng Hulyo.
Dito ay tinanong ng Philippine Entertainment Portal (PEP.ph) ang aktor tungkol sa pangangalaga ng ating kalikasan at mga hayop, pati ang climate change.
Read: Dingdong Dantes names his top three Amazing Earth destinations
Ayon sa Kapuso actor, “I think everybody should also do their part. And hindi lang siya dapat one-time thing.
“Halimbawa, kung gagawa ka ng isang bagay ng para sa kalikasan o para sa kapaligiran mo o sa lipunan, hindi puwedeng one session lang tapos na.
“I think it has to be a way of life. So, kung ang commitment mo ay pangalagaan ito, kailangan… you have to choose it every day at hindi lang because of convenience.”
Ipinaliwanag daw ni Dingdong kay Zia, panganay na anak nila ni Marian, kung ano ang mangyayari kung hindi mapapangalagaan ang ating kapaligiran.
Lahad niya, “Kailangan siyempre yung actual exposure, e.
“Maganda na maririnig din nila yung theories kung ano yung dapat at hindi nila dapat gawin.
“Tapos tatanungin nila… halimbawa si Zia, nagta-travel kami.
“Halimbawa, pumupunta kami sa beach, parati kong pinapaalala sa kanya. 'Tingnan mo ang kapaligiran, kapag may nakikita kang plastic, pulutin mo. Kasi wala dapat ‘yan diyan. Kasi ito ang magiging epekto niyan sa tubig kung sakaling pumasok ‘yan sa loob. Ito ang kakainin ng mga species sa loob ng tubig, at ito yung masamang epekto.'
“Parang in theory, kapag kinukuwento ko siya, okay, medyo naiintindihan niya. Pero mas na-appreciate niya ito noong ipinakita ko na talaga, nung dinala ko na siya dun. 'Ito yung basura, ito yung ano… ito yung maaaring maging epekto kapag hindi natin gawin ito.'
“So, iba talaga kapag praktikal, nararamdaman, nahahawakan, at nae-experience nila.
“So, ito talaga yung plano."
“Kami ni Marian," patuloy ni Dingdong, "ito yung plano namin to really expose them with these things para maisabuhay talaga nila later on, dahil alam nila yung impact nito sa kanila, at alam na nila ang magiging impact sa kanilang magiging kapaligiran.”
LEAD BY EXAMPLE
Ang nakakatuwa, sabi ni Dingdong, nakuha niya ang interes ni Zia nang sinimulan niya sa pagbabasa ng libro at sinasamahan pa raw niya ng acting.
Lahad niya, “Nag-umpisa kasi ito nung binigyan ako ng libro ni Ogie Rivera, isa sa ating napakalupit na manunulat, and I was privileged na mabigyan ng ganung libro.
"Para siyang… very easy to understand na may mga drawing. So, bago matuto sila, kinukuwento ko tungkol sa isang character… sa isang octopus kung ano ang nangyari sa kanya dahil sa ganito.
“Sa mga ganung bagay na kailangan mong lagyan ng konting… sasamahan mo ng theatrics, e, para maging mas interesado yung mga bata.
“Kapag nilagyan mo ng theatrics, nilagyan mo ng cartoons, kapag naintindihan nila…may acting din yun kasi parang… siyempre kailangan, baka sabihin nila parang fake naman ito. You have to get their attention.”
Natutuwa naman daw si Zia na minsan ay pinapaulit pa raw ito sa kanya.
“Siyempre, uulitin ko naman yun,” bulalas ni Dingdong.
Naniniwala si Dingdong na bilang isang magulang, dapat magpakita ka ng magandang ehemplo sa iyong mga anak.
“You should lead by example. Sa lahat naman 'yan, di ba? Sa tahanan mo, o sa kahit ano mang institusyon, you have to lead by example.
“Kasi kung ano yung nakikita sa ‘yo, most likely yun ang gagayahin ng iyong mga anak.
"Kaya it’s really important to also set the culture sa loob pa lang nga mga tahanan,” saad niya.
Isa raw ito sa napagtanto niya at mga natutunan sa programang Amazing Earth, kung paano mapapanatiling "amazing" din ang ating bansa.
“Kung maraming natutunan ang audience, lalo na ako. Kasi isipin mo… parang tingin ko ay ako ang kauna-unahang audience ng show na ito dahil ako talaga ang nagbabasa… I mean, binasa ko yung istorya. So, kumbaga, ako yung unang nai-inform.
“Kaya sinasabi ko, manghang-mangha ako every time na nagbu-voice over dahil, if there’s always something new na idadagdag sa akin tuwing ginagawa ko ito.
“Kumbaga, hindi lang siya parang trabaho sa akin, ano na siya, naging way of life na dahil siyempre… you know, kailangan talaga natin nga mga inspirasyon to carry on ng mga ginagawa natin,” seryoso niyang pahayag.
Mayroon ba siyang gustong iparating o hiling sa ating bagong administrasyon para mapapanatili ang pangangalaga sa ating kapaligiran, sa ating kalikasan at kahayupan?
Pahayag ng dating National Youth Commission chairman, “Maraming mga plano ang pamahalaan para dito, at nasaksihan ko ang mga ito nang nabigyan ako ng pagkakataong magsilbi noong 2014 to 2016.
“Sigurado rin ako na may mga ideas mula sa current administration natin para mapalakas at mapabuti ang polisiyang ito. Pero sa aking palagay, ang susi para makamit ang mga ito ay ang pagkakaroon ng proper execution at strong political will para ma-realize ang mga goals na ito.
“Pero hindi ito nagtatapos sa pamahalaan lamang. Malaking bahagi din ang participation nating mga mamamayan.
“Kaya sa tingin ko, hindi lang siya dapat hinihiling kundi kusa ito at dapat manggaling sa atin — sa ating mga citizens, sa ating mga tao — dahil tayo rin naman talaga ang tagapangalaga, di ba? Tagapangalaga nitong magagandang bagay na ibinigay sa atin ng Panginoon.
“So, I think, everyone has their own role in taking care of all these God-given gifts. So, mapa-hayop man 'yan, mapa-kalikasan man 'yan, o kahit ano man, pati itong tinatamasa nating kalayaan, di ba? Kailangan pangalagaan natin.
"And everyone should play their significant part by being responsible citizens."