Kinumpirma ni Alfred Vargas, 41, na high risk ang pagbubuntis ng asawang si Yasmine Espiritu, 35, sa kanilang pang-apat na anak.
May tatlong anak sina Alfred at Yasmine: sila Alexandra Milan, Aryana Cassandra, at Alfredo Cristiano.
Ayon kay Alfred, bed rest ang ipinayo ng doktor sa asawa at kinakailangan nito ng ibayong pag-iingat at pag-aalaga.
Read: Alfred Vargas, hindi pa alam ang gender ng fourth baby nila ni Yasmine Espiritu
"Among her four pregnancies, this is her most difficult. Pabalik-balik kami sa hospital.
"Pero ang good news naman, sa lahat ng ultrasound, sa lahat ng tests, healthy naman si baby namin," saad ni Alfred sa panayam ng PEP.ph (Philippine Entertainment Portal).
Ano ang kondisyon ni Yasmine base sa diagnosis ng doktor?
Sagot ni Alfred: "May hyperemesis siya, tapos mayroon siyang general anxiety disorder kaya lalong bumibigat yung [pakiramdam niya] pag nati-trigger."
Ang hyperemesis gravidarym, ayon sa medlineplus.com, ay tumutukoy sa matindi at madalas na pagkahilo na maaaring magresulta sa dehydration at weight loss.
Patuloy ni Alfred: "Tapos yung cervix niya, medyo nagkaroon kami ng kaunting challenge dun.
"Kasi isang beses, nag-routinary check-up kami, tapos biglang nag-open yung cervix niya, in-admit na siya kaagad.
"Thank God, she underwent naman a procedure called cerclage, sinara yung cervix niya."
Nakapanayam ng PEP.ph si Alfred sa 10th anniversary ng Urban Smile Dental Clinic at 36th birthday celebration ni Dr. Ralph Figaroa delas Alas, na ginanap sa Seda Hotel nung Lunes, September 18, 2023.
Read: Alfred Vargas reveals feeling "so depressed" because of weight gain; loses 50 pounds
ON HIS MOVIE WITH NORA AUNOR
Ratsada ang trabaho ni Alfred sa pag-arte. Pagkatapos ng teleseryeng Arabella sa GMA-7, ngayon ay abala siya sa pelikulang Pieta.
Makakasama niya sa pelikula sina Nora Aunor at Gina Alajar. Ang direktor ay si Adolf Alix.
Hiling niya na makasali sa Metro Manila Film Festival ang Pieta.
"I-a-apply namin, pero alam naman natin na hindi ganun kadali. Papasok sa butas ng karayom iyan.
"Pero hopefully, nandiyan naman si Ate Guy, hopefully we have a shot."
Excited pang sabi ni Alfred, "Masarap, nakaka-inspire. Hanga na ako sa Superstar nung bata ako, pero nung naka-eksena ko na siya, dun ko naramdaman yung pagiging Superstar niya."
Bukod sa kanyang showbiz career, abala rin si Alfred sa kanyang pag-aaral.
Nag-enrol siya sa University of the Philippines para tapusin ang kanyang doctorate degree in Urban Planning.
"Kanina may class ako. Um-attend muna ako bago kami rumampa dito sa Urban Smile anniversary.
"When I was taking my master's in Public Ad, tapos kumuha ako ng crash course sa Urban Planning, dun ko nakita na marami akong ma-a-apply na lessons in terms of governance saka policy-making.
"For me, dapat lagi tayong nag-aaral, saka nag-e-enjoy ako mag-aral."
Sinisingit daw talaga niya ito sa kanyang schedule.
"It's minimum of four years, mga six units per semester. Saka twice a week lang, Mondays and Wednesdays lang naman so kaya iyan.
"Siyempre, may sakripisyo, ang dami ko na ring telenovela na tinanggihan, ang dami ko na ring projects na tinanggihan saka mga movies.
"Okay lang sa akin, kaya kong i-sacrifice yun."
Read: Alfred Vargas, trip to South Korea ang regalo sa anak na nagtapos sa elementarya
ON ALFRED'S SON CRISTIANO
Kasamang dumalo sa event ang bunsong anak ni Alfred na si Cristiano, na puwede-puwede ring mag-artista.
Tinanong si Alfred kung papayagan niya ang anak na sumabak sa showbiz pagdating ng panahon.
"Papayagan ko. Kung saan nila gusto, I will fully support them," sagot ni Alfred.
Dugtong niya: "I will give to my children all the opportunities na hindi ko nagawa sa buhay ko.
"Pero ako, nakikita ko si Cristiano, mukhang may inkling. Tapos yung isa parang gustong maging doctor.
"Let's see. I'm happy for my children."
Sa huli, masayang sinabi ni Alfred kung paano niya binabalanse ang oras niya para sa pamilya.
"Ini-schedule ko. May mga araw talaga na para sa misis ko, may araw para sa anak ko, may araw para sa trabaho.
"Actually bukas marami akong trabaho kaya kasama ko ang anak ko na si Cristiano, kaya medyo maaga kaming uuwi kasi may pasok siya bukas."