Bukas na sa mga turista ang Engkantadora Falls na matatagpuan sa Sitio Barangobong, Barangay 23 Dipilat, Vintar, Ilocos Norte simula noong September 18, 2022.
Ipinagbawal ang pagbisita rito noong 2020 nang pumutok ang pandemya.
Madali itong puntahan ayon kay Barangay Captain Nick Foronda, dahil 18 kilometro lang ang layo nito mula sa munisipyo ng Vintar.
Ang pamunuan din ng barangay ang namamahala at nagpapanatili sa kaayusan at kalinisan ng Engkantadora Falls.
Magandang dumayo rito para mag-picnic at maglangoy.
Mayroon ding kayaking activities. Ang renta sa kayak ay PHP50 para sa 30 minuto.
Ang entrance fee ay PHP10. Nasa PHP400 naman ang renta para sa cottages.
Bago nagkaroon ng pandemya, umaabot sa 300 hanggang 500 ang nagiging bisita sa Engkantadora Falls.
Sa pagbubukas nitong muli, may dagdag kita ang barangay.
Pinakamainam daw na bumisita sa Engkantadora Falls sa panahon ng tag-ulan.
Sa falls din umaasa ng tubig para sa irigasyon ang mga taniman ng palay at mani sa lugar.
Samantala, nagtakda ng mga panuntunan ang pamunuan ng barangay para mapanatiling malinis ang falls.
Mahigpit na ipinatutupad ang “clean as you go” rule.
Required din ang mga bisita na magdala ng sariling trash bag.