Noong nakaraang Metro Manila Film Festival (MMFF), kumita nang husto ang English Only, Please (EOP) ng Quantum Films ni Atty. Joji Alonso.
This year, entry naman ng Quantum Films (kasama ang MJM Productions, Inc., Tuko Film Productions at Buchi Boy Films) ang Walang Forever na pinagbibidahan nina Jennylyn Mercado at Jericho Rosales.
Mas malaki raw ang budget ng Walang Forever kaysa EOP.
“Kasi nag-Taiwan shoot pa kami, e. Dahil dun based si Echo [referring to Jericho who plays a website developer],” kuwento ni Atty. Joji.
Nakadalawang araw lang raw na shoot ang pelikula sa Taiwan.
“Pero still the expense, bringing the people there, hiring people there, mas mahal,” dagdag niya.
Alam ng marami na ang orihinal na kapareha sana ni Jennylyn sa Walang Forever ay si JM de Guzman. Pero dahil sa mga “personal issues” ni JM ay pinalitan ito ni Jericho.
Ano ang masasabi ni Atty. Joji tungkol dito?
Sagot niya, “Siyempre malungkot!
“Siyempre naman malungkot, kaya lang I don’t wanna discuss it any further, kasi he has his own concerns to deal with. So iyon. I still hope for the best for JM.”
Nakapag-shoot na si JM ng isang araw para sa pelikula.
Pero willing pa rin naman daw si Atty. Joji na kuning artista si JM balang araw.
“It depends. It depends kung hindi na siya busy,” at tumawa si Atty. Joji.
Busy saan?
“Ewan ko, marami siyang ginagawa,” at muli itong tumawa.
TWO MMFF ENTRIES FOR 2015. Bilang isang independent producer, kahanga-hanga na dalawa ang entries ni Atty. Joji sa Metro Manila Film Festival ngayong taong ito: ang Walang Forever at ang Buy Now, Die Later.
Sabi niya, “E, kami naman, nag-submit lang kami ng script, hindi naman namin in-expect.
“Kasi either of the two, kung alin yung matatanggap, okay.
“Tapos, nung in-announce sabi ko, ‘Oh My God, dalawa!’”
Natuwa ba siya o namroblema nung ina-announce na dalawa ang napili sa kanyang mga entries? O sumakit ang ulo niya dahil dalawa ang gagastusan niya?
Pag-amin niya, “Paano ba sasagutin?
“Nalungkot ako na kinabahan ako, kasi ang tindi ng pressure to finish two films.
“Natutuwa ako kasi nabigyan ng chance yung mga alternative na stories na iniisip namin.
“Yun bang kayang-kayang abutin ng masa pero iba, ibang storytelling.”
Bilang isang producer, kung may dream cast siya para sa susunod niyang pelikula, sino iyon?
“Gusto kong i-cast si Jennylyn 'tsaka si Piolo [Pascual].”
Bakit hindi niya kinuha si Piolo para sa Walang Forever?
“Meron siyang soap, e. So hindi kaya. Nagmamadali na kami.”
Hindi na raw niya tinangkang kunin pa si Piolo para sa Walang Forever.
“When I learned that he had a soap, impossible yun, hindi ko na pinursue kasi busy masyado.”
BIOFLICK. Makulay ang buhay ni Atty. Alonso. Hindi ba niya naisip na next year ay ang buhay naman niya ang isapelikula at isali sa MMFF 2016?
“Naku, e, di lahat ng pelikula, buhay ko lang, sa haba nun,” sabay tawa niya.
Wala raw siyang interes na gawing pelikula ang buhay niya.
Nakausap ng PEP.ph (Philippine Entertainment Portal) si Atty. Joji sa presscon ng Walang Forever sa Kuya J restaurant sa SM Megamall.
HAPPY FOR SON'S ACTING CAREER. Isa sa mga artista sa Walang Forever ang anak ni Atty. Joji na si Nico Antonio. Pero napansin naming wala ito sa presscon.
“Bawal! Kasi Kuya J ito, he’s the new endorser of another food chain,” at tumawa si Atty.
Endorser si Nico ng Mang Inasal, habang si Jericho naman ang endorser ng Kuya J.
Speaking of Nico, natutuwa si Atty. Joji na maganda ang takbo ng career ng kanyang anak.
Pagpapasalamat niya, “Sa awa ng Diyos, oo.
“Ako kasi, ang hini-hope ko for him, kasi kahit anak ko yan, kung hindi ko nakikitaan ng talent, I would not support him.
“But I really, honestly, sincerely… nung una, alam ko na meron [acting talent], pero hindi pa siya bumibitaw sa comfort zone niya, e.
“So it took him time. Hindi niya alam dati kung ano talaga ang gusto niya, kung gusto niyang mag-pursue ng law career or ito.
“Gusto niya talagang magpatawa ng tao.
“Since he was a kid, ginagaya na niya si Rene Requiestas. That’s how he is, he likes to make people laugh.”
Bukod kina Jennylyn (bilang si Mia), Jericho (bilang si Ethan) at Nico (bilang Winwin), ang iba pang cast members ng Walang Foreever ay sina Ms. Lorna Tolentino (bilang Betchay), Jerald Napoles (bilang Tonypet), Pepe Herrera (Aldus), Myke Salomon (Chico), Kim Molina (Luli), Cai Cortez (Katkat), Patrick Sugui (Junjun), Rustica Carpio (Yaya Meding), Juan Miguel Severo (Pepper), at Sebastian Castro (Vlad).
Palabas na sa December 25, ito ay sa direksyon ni Dan Villegas.
NO PLANS OF ENTERING POLITICS. Tumatakbong Senador si Atty. Lorna Kapunan.
Wala bang plano si Atty. Joji na pasukin ang pulitika?
“Ay wala,” bulalas ni Atty. Joji.
“I’ve been asked many times to run. I always said no.
“Q.C. dalawang beses, Senate dalawang beses, four times.”
Nagsasalita raw siya nang tapos na hindi siya tatakbo.
“Hindi pa ako nasisiraan ng ulo,” at tumawa ito.
“Hindi, joke lang naman yung nasisiraan ng ulo. Kasi di ba?
“I mean considering all the difficulties that you have to go through to… I mean through the campaign and becoming a politician, hindi biru-biro yun.
“Hindi ko kaya yun!”
Iboboto naman daw niya si Atty. Kapunan.
“Oo naman! Magaling naman talaga si Lorna at saka ano yun, may advocacy siyang pinu-pursue.”
PRESIDENTIAL BET. Sa mga presidentiables, vocal si Atty. Joji kung sino ang choice niya.
“Duterte ako, e!”
Bakit si Davao City Mayor Rodrigo Duterte ang iboboto niya?
”Pagod na ako, e,” at tumawa si Atty. Joji.
Pagod sa?
Aniya, “Sa maraming bagay.
“I want something new, I want something new.”
Sa vice-presidency?
“Ah, I haven’t decided yet.”