"The who" at "sino sila" ang mga komento na inaasahan namin na mababasa mula sa PEP (Philippine Entertainment Portal) commentators tungkol sa isyu sa pagitan ng Baywalk Bodies member na si Michaela Espinosa at ng aspiring young actor na si Angelo Ilagan.
Sa pamamagitan ng text brigade, ipinaalam sa lahat kahapon, April 3, ng Baywalk Bodies manager na si Lito de Guzman ang diumano'y pagnanakaw ni Angelo sa mga gamit ni Michaela.
Hinihingi nina Lito at Michaela ang tulong ng media para malaman ang kinaroroonan ng batang aktor. Cell phone, pera, mamahaling bluetooth, at shades ang ilan sa mga personal na kagamitan ni Michaela na diumano'y tinangay ni Angelo.
Hindi ito ang unang pagkakataon na nasangkot si Angelo sa nakawan issue.
A few months back, kumalat ang balita na ninakawan din niya diumano ang isang award-winning director na pinili na lang ang manahimik tungkol sa isyu.
Marami ang nanghihinayang kay Angelo dahil sa kanyang acting ability. Nagkaroon siya ng malaking break sa showbiz nang maging mainstay siya ng Mga Anghel Na Walang Langit, isang nagwakas na TV series ng ABS-CBN. Siya rin ang gumanap na anak ni Jaclyn Jose sa highly-acclaimed digital movie na Sarong Banggi.