Sa kauna-unahang pagkakataon, inihayag ni Edgar Allan Guzman na may gusto pa rin siya sa aktres na si Shaira Diaz.
Ito ay matapos ang ilang taong pagiging mailap ng aktor pagdating sa estado ng kanyang love life.
Pitong taon ang agwat ng edad nina Shaira, 23, at Edgar, 30.
Sa kanyang Instagram post noong March 20, ibinahagi ni Edgar ang dalawang close-up pictures ni Shaira.
Inilagay niya sa caption ang isang lovestruck emoji at mga katagang “I have a crush on you.”
Sa comments’ section, maiksi pero halatang kilig ang reaksiyon ni Shaira.
Tila gulat niyang komento, “Omo!!!”
Ang “omo” ay salitang Korean na ang English translation ay “oh my gosh.”
Kalakip nito ang monkey-with-hands-on-the-mouth at blushing emojis.
Balik-sagot naman ni Edgar ay simpleng "hi" at blushing emoji.
SUPPORTIVE FRIENDS
Marami sa mga malalapit na kaibigan nina EA at Shaira sa showbiz ang ikinatuwa ang pagiging bukas ng aktor sa kanyang nararamdaman para sa dalaga.
Panay ang tukso kay Edgar nina Gabbi Garcia, Winwyn Marquez, Rayver Cruz, Janine Gutierrez, Rodjun Cruz, Valeen Montenegro, at Jason Abalos.
Narito ang kanilang reactions sa "kilig" post ni Edgar:
EA-SHAIRA RELATIONSHIP HISTORY
Naging magkarelasyon sina Edgar at Shaira noong 2013—mga panahong pareho pa silang nasa bakuran ng TV5 network.
Pero bandang latter part ng 2017, nagsimulang maging mailap ang dalawa tungkol sa kanilang relasyon.
Hanggang sa tuluyang naghiwalay umano ang dalawa.
Sa kabila nito, consistent sila sa pagsasabing nanatili silang mabuting magkaibigan.
Paniwala pa ng iba, nagkabalikan na sina Edgar at Shaira dahil magkasama silang nagbakasyon sa New York noong nakaraang taon.
Hindi rin malayong mas mapalapit sila sa isa’t isa ngayong pareho na silang co-manage ng GMA Artist Center.