Sa unang pagkakataon ay nakitang kasama ni Ciara Sotto ang bagong non-showbiz boyfriend niyang si Ian Austin sa isang showbiz event.
Magkasamang dumalo ang dalawa sa premiere night ng Mystified kagabi, March 23, sa EDSA Shangri-La Plaza, Mandaluyong City.
Nakuhanan ng PEP.ph (Philippine Entertainment Portal) ng litrato sina Ciara at Ian na magkasama kagabi.
Nag-post rin si Ciara ng picture nila ni Ian kasama ang mga bida ng Mystified na sina Sunshine Dizon, Iza Calzado, at Karylle, na nag-imbita sa kanya sa premiere night.
Wala sa litrato ang isa pang bida ng pelikula na si Diana Zubiri, na may pinuntahan sandali habang papasok sa sinehan.
Bukod sa pagiging malapit na kaibigan ni Karylle, nakatrabaho rin ng matagal ni Ciara ang director ng Mystified na si Mark Reyes sa first batch ng youth-oriented series na TGIS.
Nagkasama rin si Ciara at Sunshine sa second batch ng TGIS.
CIARA'S NEW LOVE LIFE
Noong September 23, 2018 unang naisapubliko ang masayang estado ng love life ni Ciara Sotto, dalawang taon at kalahati mula nang maghiwalay sila ng mister niyang si Jojo "Joe" Oconer.
Kasama ni Ciara sa litrato si Ian sa wedding anniversary dinner ng mga magulang niyang sina Helen Gamboa at Senator Tito Sotto.
Noong November 18, 2018 naman unang pinangalanan ni Ciara sa Ian, sa pamamagitan ng isang Instagram post.
Noong Valentine's Day, February 14, 2019, nag-post si Ciara sa Instagram ng before-and-after photo nila ni Ian, kung saan magkasama rin sila noong Valentine's Day 2008.
Saad ni Ciara sa caption, "11 years after... Happy Valentine’s Day!!! #whowouldvethought"