Nagluluksa ang pamilya ni House Representative at Star for All Seasons Vilma Santos-Recto dahil sa pagpanaw ng kanyang mahal na ina na si Mrs. Milagros Santos.
Sumakabilang buhay si Mama Milagros ngayong Lunes ng umaga, April 1, sa isang ospital sa Batangas. Siya ay 93.
Hindi pa naglalabas ng official statement ang Santos family tungkol sa dahilan ng pagpanaw ni Mommy Milagros.
Pero ayon sa ilang malalapit sa kanila, magsisimula ang public viewing sa labi ng ina ng Star for All Seasons sa April 3, Miyerkules, sa Loyola Memorial Chapels, Sucat, Parañaque City.
Matagal nang hindi nakikita sa mga public gathering si Mommy Milagros mula nang magkaroon siya ng Alzheimer’s Disease.
Bumuhos ang pakikiramay sa mga naulila ni Mommy Milagros, pati na sa kanyang apo na si Luis Manzano na nag-post sa Facebook account nito ng “RIP Mama Ganda.”
