Nakunan ng video ang model-actor na si Clint Bondad na nakikipaghalikan sa isang hindi kilalang babae.
Isang anonymous source ang nagpadala ng video sa PEP.ph (Philippine Entertainment Portal) kagabi, April 4.
Kung pagbabasehan ang video, tila nasa bar si Clint at ang babae.
Naka-tag din sa naturang video si Clint at ang babae.
Noong March 25, nag-post si Clint ng picture habang naglalaro ng golf.
Katabi niya ang isang babae, pero natatakpan ng cap ang mukha nito.
Hindi malinaw kung ang babaeng kasama ni Clint habang naggu-golf at ang babaeng kasama niya sa bar ay iisa.
Pero may nakapagsabi sa PEP.ph na iisa ang babaeng kasama ni Clint sa dalawang okasyon.
Wala pa rin kaming impormasyon kung ano ang estado ng relasyon ng dalawa.
Nagpadala ang PEP.ph ng direct message kay Clint upang kunan ng reaksiyon hinggil sa pagkalat ng video niya.
Ilalathala namin kaagad sa oras magpadala ng reaksiyon ang model-turned-actor.
Nitong February ay kinumpirma ni Miss Universe 2018 Catriona Gray na break na sila ni Clint pagkatapos ng anim na taong relasyon.