Mabilis na kumalat sa social media ang mga larawan ng veteran actor na si Eddie Garcia na buhat ng ilang kalalakihan sa isang lugar sa Tondo, Manila, ngayong Sabado, June 8.
Sinasabing bigla na lamang umanong natumba si Eddie sa gitna ng on-location taping ng Rosang Agimat, isang upcoming series ng GMA-7.
Makikitang may isang lalaking naglagay ng cold compress sa ulo ni Eddie, habang buhat ng pitong kalalakihan ang beteranong aktor.
May isa pang lalaking nagtutok ng electric fan sa mga ito, dahil halatang tirik ang araw nang maganap ang insidente.
Kumalat din sa social media ang impormasyong na-comatose diumano si Eddie sa isang ospital sa Tondo.
Pero habang isinusulat ang artikulong ito, sinasabing "na-revive" na ang beteranong aktor at inilipat na sa isang ospital sa Quezon City.
Humingi na ang PEP.ph (Philippine Entertainment Portal) ng official statement mula sa GMA-7 hinggil sa insidente.
Agad namin itong ilalathala oras na matanggap namin ito.
Samantala, kinumpirma ng pamilya ni Eddie na inatake sa puso ang aktor at kasalukuyang "under critical observation."
Hiniling nila sa mga tagasuporta ng aktor na patuloy na isama sa panalangin ang mabilis na paggaling nito.
Sabi pa rito, "Our family would like to extend our sincerest gratitude to all those who have expressed concerns and extended prayers."
Ilan sa mga artistang naghayag ng kanilang panalangin ay sina Sharon Cuneta, Vice Ganda, Ogie Alcasid, Aiko Melendez, Sunshine Cruz, at Vivian Velez.