Nananatiling nasa kritikal na kundisyon ang beteranong aktor at direktor na si Eddie Garcia ngayong ika-12 araw niya sa Makati Medical Center.
Naaksidente si Eddie, 90, noong June 8 sa set ng ginagawa niyang teleserye sa GMA-7, ang Rosang Agimat.
Ayon sa latest medical bulletin ng kanyang attending physician na si Dr. Regina Macalintal-Canlas ng Makati Medical Center, naka-ventilator pa rin ang aktor para sa maayos na paghinga nito.
Nakasaad pa sa Medical Bulletin #5 ng Makati Medical Center na inilabas ngayong araw, June 19:
"Mr. Garcia continues to be in critical condition.
"He remains dependent on the ventilator to breathe and medications to support his blood pressure.
"His latest electroencephalogram (EEG) study showed minimal brain activity.
"Visitors are strictly limited to prevent complications from occuring."
Nasa "Do Not Rescusitate Status" o DNR ngayon si Eddie alinsunod na rin sa kagustuhan ng kanyang pamilya.
Iniimbestigahan na ng GMA management kung bakit walang nakaantabay na medical personnel at ambulansiya sa taping ng kanilang teleserye noong nangyari ang insidente.