Nakaramdam ng pananabik ang netizens at fans ni John Lloyd Cruz matapos mag-post ang aktor sa verified account nito sa Facebook ng kanyang larawan na tila kuha mula sa isang studio photo shoot.
Kagabi, June 20, nag-update ng profile picture si John Lloyd sa Facebook.
Sa larawan, naka-skinhead haircut si John Lloyd, medyo na-trim na rin ang kanyang balbas, at maayos ang kanyang porma.
Malayung-malayo ito sa mga nag-viral niyang larawan kung saan medyo rugged ang look, balbas-sarado, at mahaba ang buhok ng aktor.
Ibinahagi rin ni John Lloyd ang larawang ito sa kanyang Instagram Stories kagabi rin.
Hindi tinukoy kung bago o luma na ang nasabing larawan ni John Lloyd.
Ngunit nakatanggap ng impormasyon ang PEP.ph na ang nasabing larawan ng aktor ay noong 2015 pa kinunan, pagkatapos gawin ni John Lloyd ang pelikulang Honor Thy Father.
Ang larawan ay kuha ng sikat na photographer na si Cyrus Panganiban.
NETIZENS REACT
Pero base sa reaksiyon ng netizens, tila marami na ang nakaka-miss sa dating hitsura ni John Lloyd.
Marami rin sa kanila ang naghihintay sa pagbabalik-showbiz ng aktor matapos itong mag-indefinite leave noong 2017.
