Pumanaw na ang jazz icon na si Jacqui Magno dahil sa pancreatic cancer.
Siya ay 65 taong gulang.
Binawian siya ng buhay bandang 4:05 ng hapon ngayong Biyernes, June 21, sa University of the East Ramon Magsaysay (UERM) Memorial Hospital.
Ito ang balitang ipinaabot sa PEP.ph (Philippine Entertainment Portal) ng kaibigan ng singer na si Vivian Velez.
Sa Facebook, nauna na rin si Vivian na nagpaabot ng pakikiramay sa mga kamag-anak ni Jacqui.
Nag-post din sa social media ang kapwa singers na sina Lea Salonga, Richard Merk, at Noel Cabangon bilang pagpupugay kay Jacqui.
Nagsimula ang professional career ni Jacqui bilang female singer ng bandang Genesis Band, kung saan nakasama niya si Basil Valdez.
Ngunit naunsiyami ang kanyang singing career nang mabuntis siya.
Tatlong buwan pagkatapos niyang manganak, bumalik sa pag-awit si Jacqui sa pamamagitan ng legendary Circus Band.
Pero hindi rin nagtagal ang stint niya rito dahil noong panahong iyon ay mas gusto niyang pagtuunan ng pansin ang pagiging isang ina.
Makalipas ang ilang taon ay nagdesisyong bumalik sa pagkanta si Jacqui ngunit bilang solo jazz singer na.
Mula sa PEP.ph (Philippine Entertainment Portal), ang aming taus-pusong pakikiramay sa naiwang pamilya ni Jacqui.
