Nasangkot sa isang aksidente ang host-comedian na si Eagle Riggs sa Palawan nitong madaling-araw ng Linggo, August 18.
Ayon sa post ng Facebook page na Palawan News ngayong Lunes, August 19, tumatawid daw sa kalsada ang host-comedian nang mabangga ng isang motorsiklo.
Dagdag pa sa ulat, naoperahan na raw sa binti si Eagle sa isang ospital doon.
Nasa Puerto Princesa, Palawan si Eagle dahil nag-host ito ng isang show noong Sabado, August 17.
Saad sa report: “Actor and TV host Eagle Riggs met an accident following a show on Saturday.
“He is now confined at the Cooperative Hospital after a leg operation.
“Riggs was hit by a motorcycle on Sunday around 5:00 in the morning while crossing the road in Barangay Bancao-Bancao.”
Sa kanya namang Facebook account may ilang oras lamang ang nakalilipas, nakapag-post pa si Eagle ng mga larawang kuha noong gabi ng kanyang hosting stint.
Nakipag-ugnayan na ang PEP.ph (Philippine Entertainment Portal) kay Eagle sa pamamagitan ng Facebook upang alamin ang kanyang kasalukuyang kalagayan at makakuha pa ng ibang detalye tungkol sa aksidente.