Nasa New Jersey si Gladys Gueverra nang tumawag kagabi sa Startalk at sa PEP (Philippine Entertainment Portal). Nakarating kasi sa komedyana ang balitang nagdadalang-tao raw siya.
Isang mariing tawa ang isinagot ni Gladys sa isyu.
"Nakakatawa, sanay na naman tayo sa showbiz, di ba? Kapag nawawala ka, buntis nagtatago. ‘Pag bumalik ka na wala kang dalang bata, nagpalaglag, di ba?" ani Gladys.
May ilang buwan nang namamalagi si Gladys sa New Jersey kasama ang kanyang boyfriend na si Philip Peredo.
Mula nang sumamang umalis si Gladys kay Philip, hindi na ito bumalik sa bansa.
"Hindi ako titira dito. Actually ang unang plano [namin] ni Philip, is ma-consume lang [ang visa] kasi kapag naka-multiple entry visa ka... Kapag naka tourist visa ka, puwede kang mag-stay sa U.S. up to six months," paliwanag ni Gladys.
"Mahirap magtagal dito tapos mahihirapan akong bumalik kasi, di ba, nagso-show pa rin tayo sa U.S. Pabalik-balik so ayokong ma-question kaya pinakamatagal ko na two or three months. Bakasyon lang talaga ito saka wala pang matinding something kaya nakakatawa kasi andidito na nga ako."
Nilinaw rin ni Gladys ang set-up nila ni Philip. Matatandaang inamin ng boyfriend na nakapag-pundar na siya ng titirahan nila ni Gladys sa New Jersey. Mas maganda raw ang ganun dahil kasama niya ang girlfriend sa tuwing bibisita ito sa Amerika.
"Masaya kami ni Philip, lagi kaming nagkikita. Saka iko-korek ko lang kasi ang daming nagtatanong sa akin kung nagsasama na raw ba kami ni Philip, nagpakasal na raw ba kami. Sabi ko hindi, nakatira ako sa pinsan ko. Hindi kami magkasama ni Philip, nagkikita kami kasi parehong sa New Jersey kami," paglilinaw ng comedienne.
"Nakakatawa naman. Alam mo bakit ako natatawa kasi ang naikuwento sa akin na nakalagay raw diyaryo, usap-usapan sa New Jersey ng mga Filipino. What's funny about it [is that] wala kaming masyadong Filipino na nakakausap dito. Yung area namin siguro thirty-minute drive para makakita ka ng maraming Filipino, saka hindi ako naglalalabas."
Napag-usapan na raw nina Philip at Gladys ang magpakasal pero hindi pa ganoon kalinaw ito.
"May plano pero wala pa kaming date, saka wala kaming lokasyon. Gusto muna naming i-enjoy ang sarap kasi, e. Mag-enjoy muna, di ba? Sabi rin ni Philip, relax muna ako from my work," sabi ni Gladys.