Sinabi ni Marky Cielo sa PEP (Philippine Entertainment Portal) na hindi na siya natutuwa sa kumakalat na balitang meron daw siyang "gay lover" kaya marami siyang trabaho ngayon sa GMA-7.
Pakiusap ni Marky, sana raw ay maging considerate ang ibang tao sa nararamdaman niya at ng taong sinasabi nilang "gay lover" niya. Hindi na raw kasi nakakatuwa ang mga tsismis dahil may ibang tao na raw na naaapektuhan.
Pinasinungalingan nga ni Marky ang naturang relasyon na iyon dahil ang turing niya sa taong natsitsismis na "gay lover" niya ay parang tatay lang.
"Naaawa na nga ako sa taong iyon kasi wala naman siyang ginagawang masama sa akin o sa ibang tao.
"Nagiging matulungin lang siya sa maraming tao. Siya ang tinuturing naming tatay kapag may mga problema kami. Pati ba naman iyon nilalagyan nila ng malisya?" diin pa ni Marky.
Noon daw ay dinededma lang ni Marky ang mga usap-usapan na may gay lover siya. Dinadaan pa nga raw niya sa tawa ang lahat. Ang tutok lang talaga ng StarStruck Sole Survivor ay ang magtrabaho nang mabuti.
"Kung may trabaho man ako, kasama kasi iyon sa naging kontrata ko sa GMA Artist Center. Nagpapasalamat ako na nabibigyan kami ng trabaho. Ako naman, gusto kong ipakita na seryoso ako sa pinasok kong ito. Kaya hindi ko pinapansin ang tsismis. Trabaho lang talaga tayo.
"Pero lately nga, sunud-sunod ang mga nagtatanong, ‘tapos may fans na nagagalit nga sa taong ito na ang turing namin ay parang ama. So, unfair naman, ‘di ba? Kaya ako na ang nagsasabi na walang gano'ng relasyon talaga. Please lang tigilan na nila ‘yan."
Pero may usap-usapan pang ang "gay lover" daw niyang ito ang pumipigil para manligaw siya ng babaeng type niya.
"Pati ba naman ang 'di ko pagligaw nagiging issue sa kanila?" sabay ngiti na ni Marky.
"Choice ko naman po kung manligaw ako or hindi. Sa ngayon kasi, mas focused ako sa trabaho. Wala naman sigurong masama roon.
"Kung ligaw-ligaw rin lang, kaya ko namang gawin iyon at walang pumipigil sa akin. Pero tulad ng sabi ko, it's a choice na ginawa ko. Gusto ko munang trabaho ang unahin kesa sa magka-girlfriend. Habang bata, gusto kong makaipon at maging maayos ang future ko.
"Ang panliligaw, kahit kelan puwede mong gawin. Pero ang work, habang meron dapat pinagbubutihan para mas marami pang trabaho na dumating, 'di ba? Sa ngayon, inaamin ko na hindi ko kayang pagsabayin ang trabaho at pagkaroon ng girlfriend. Kaya mas pinili ko ang trabaho dahil ayokong sayangin ang mga opportunities na dumarating."
Isa nga pala si Marky sa nagbibida sa GMA sine novela na Kaputol ng Isang Awit na magsisimula na ngayong Lunes pagkatapos ng Maging Akin Ka Lamang sa GMA Dramarama sa hapon.