Nakausap ng PEP (Philippine Entertainment Portal) ang Showbiz Central co-host na si John "Sweet" Lapus kaninang umaga, April 23. Tuwang-tuwa ang comedian-TV host dahil sa wakas ay magkakaroon na siya ng isa pang show sa GMA-7, ang Pinoy adaptation ng hit Koreanovela na My Name Is Kim Sam Soon na pagbibidahan ni Regine Velasquez.
Bukod kina Regine at Sweet, kasama rin sa Kim Sam Soon sina Mark Anthony Fernandez, Wendell Ramos, Tessie Tomas, Maureen Larrazabal, Pauleen Luna, Carmi Martin, Mart Escudero, at Jennica Garcia.
"Answered prayer ito. Prayer ko at ng mga PEPsters. Yung iba nga sa kanila, nanawagan pa sa GMA para lang magkaroon ako ng isa pang show. I'm so thankful to them," bulalas ni Sweet, na isa sa celebrity bloggers ng PEP.
Kuwento ni Sweet, hindi na siya nakapagsalita nang tawagan siya ng executive producer tungkol sa pagkakasama niya sa Kim Sam Soon.
"Last week 'yon. Basta ang narinig ko na lang, ‘cast po namin kayo for Kim Sam Soon,'" natatawang lahad niya.
Sa sobrang tuwa niya, hindi na raw naitanong ni Sweet kung ano ang role niya sa show. Nalaman na lang niya later na Marcus ang magiging pangalan niya sa Kim Sam Soon. Siya ang mataray na assistant ni Mrs. Ruiz to be played by Carmi Martin, ang domineering mother ni Cyrus (Mark Anthony Fernandez).
"Na-watch ko ang Korean version ng Kim Sam Soon. Babae ang personal assistant ng nanay ni Cyrus dun. Naisip siguro ng GMA na mas bongga kung bading. Anyway, babae din naman ako!" biro ng TV host/actor.
Nakaka-excite nga naman ang ginawang twist na ito ng Kapuso network sa Kim Sam Soon. Kahit napanood na ang original version, kailangan pa rin daw abangan ang Pinoy version dahil sa mga bagong twist at characters na lalabas.
Last Sunday, April 20, ay nag-story conference na para sa Kim Sam Soon, pero hindi nakapunta si Sweet dahil live ang Showbiz Central tuwing Linggo.
REUNION WITH THE SONGBIRD. Matatandaang naging sidekick ni Regine si Sweet sa pelikulang Kailangan Ko'y Ikaw, ang unang tambalan ng Asia's Songbird at ni Robin Padilla na naging blockbuster.
"Excited ako at magkakasama na naman kami ni Regine," ani Sweet. "Iba din naman ang rapport namin ni Songbird. Ang maganda nito, medyo kontrabida ako sa buhay niya kaya abangan niyo 'yan."
Inamin din ni Sweet sa PEP na excited na siyang makasama ang iba pang cast ng Kim Sam Soon dahil karamihan sa kanila ay first time niyang makakasama. Tanging sina Regine at Tessie Tomas pa lang daw ang nakatrabaho ng komedyante; si Regine sa pelikula at si Tessie naman sa stand-up shows.
Sa May 2 ang first taping ni Sweet for the much anticipated Kim Sam Soon. Abangan na lang daw natin ang magiging look niya rito.
BUSY SWEET. Happy rin si Sweet at nakatapos na siya ng tatlong pelikula kahit wala pa sa kalahati ang taon. Siya ang sidekick ni Ai-Ai delas Alas sa Ikaw Pa Rin, Bongga Ka Boy!, na showing na sa May 14. Natapos na rin niya ang Love Is All That Matters under Regal Entertainment, na tungkol sa buhay ng call center agents. Pangatlo ang cameo appearance niya sa indie movie na 100, na kalahok sa Cinemalaya.
Nang amin tanungin si Sweet kung ano masasabi niya sa busy schedule niya this year, ito ang sagot niya: "Blessing lahat 'yan. Bawal magreklamo. Mas napapagod ako sa tengga kesa sa busy. Thank you, GMA. Thank you sa movie industry. Thank you Lord!"
Kahit busy si Sweet sa TV at pelikula, hindi naman niya nakakalimutan ang magbigay aliw sa pamamagitan ng live stand-up shows. Sa May 31 ay may show siya sa Music Museum, Sweetilicious, The Universal Sweet 15th Anniversary Show. For inquiries, call Ticket World at 891-9999.