Pagkatapos ni Heart Evangelista ay isa pang Kapamilya ang mapapanood na sa Kapuso network.
Ang aming tinutukoy ay ang comedienne na si Eugene Domingo. Kasama si Eugene sa Pinoy adaptation ng Koreanovela na My Name Is Kim Sam Soon, na pagbibidahan ni Regine Velasquez.
Sa listahan ng cast members na inilabas ng PEP last April 20, ay hindi pa kasama ang pangalan ni Eugene. Pero may nakapagsabi sa amin na kasali na rin sa cast ang naturang comedienne.
Upang kumpirmahin ang balitang ito ay tinawagan ng PEP sa cell phone ang tumatayong manager ni Eugene na si Ricky Gallardo. Kinumpirma ni Ricky ang balita na kasama nga si Eugene sa My Name Is Kim Sam Soon.
Nilinaw ni Ricky na bagama't tinanggap nila ang naturang proyekto ng GMA-7, hindi raw sila pipirma ng exclusive contract gaya ni Heart.
Dagdag ng manager ni Eugene, kahit noong nasa ABS-CBN pa si Eugene ay hindi nagkaroon ng exclusive contract ang komedyana. Pero project basis lang ang kontrata ni Eugene.
"We never had any contract sa kahit anong istasyon. Kay Eugene naman, trabaho lang, basta maganda ang offer, maganda ang role," banggit ni Ricky.
Nagsimula si Eugene bilang bit player hanggang sa makilala siya bilang magaling na comedienne sa mga TV shows ng ABS-CBN—Marina, Kampanerang Kuba, Kokey, Volta, atbp.—at mga pelikula ng Star Cinema —Ang Tanging Ina, Volta, D' Lucky Ones, Ang Cute ng Ina Mo, Paano Kita Iibigin?
Ang huling TV show ni Eugene sa ABS-CBN ay ang Volta with Ai-Ai delas Alas.
Bago ang My Name Is Kim Soon ay nakapagtrabaho na rin si Eugene sa bakuran ng GMA-7 sa pamamagitan ng film arm nitong GMA Films. Nakasama siya noon sa The Promise (2007) nina Richard Gutierrez at Angel Locsin, at kasalukuyan niyang ginagawa ang I.T.A.L.Y., kung saan kasama niya sina Jolina Magdangal, Rufa Mae Quinto, Dennis Trillo, Mark Herras, at Rhian Ramos.
Bukod kay Regine, na nakasama ni Eugene sa Paano Kita Iibigin?, kasama rin sa My Name Is Kim Sam Soon sina Mark Anthony Fernandez, Wendell Ramos, Tessie Tomas, Nadine Samonte, Dr. Hayden Kho, Carmi Martin, Maureen Larrazabal, Pauleen Luna, Jennica Garcia, Mart Escudero, at ang kaibigan ni Eugene na si John "Sweet" Lapus.
Gagampanan ni Eugene ang papel ng kaibigan ni Regine sa My Name Is Kim Sam Soon.