Nagdiwang ng kanyang 20th birthday ang young actor na si Dino Imperial nitong April 9. Nag-decide siyang idaos ito through a foam party sa isang bar sa The Fort.
"Malaki-laki rin ang nagastos ko, pero okey lang," sabi pa ni Dino sa PEP (Philippine Entertainment Portal). "Minsan lang kasi mangyayari yun, parang pamamaalam ko na sa teen years ko. So I decided to be with my friends and relatives.
"Gusto ko lang maging masaya. Sulit naman kasi after that, nanalo ako ng fifty thousand pesos when I joined Game KNB? [ABS-CBN game show hosted by Edu Manzano] kaya nabawi ko yung ginastos ko sa party," dugtong niya.
DARING DINO. Laging may pilyong ngiti itong si Dino. Nag-umpisa itong may wholesome image, at hanggang ngayon, gustong ma-maintain ito sa kanya ng Star Magic. Pero mukhang mas bagay kay Dino ang medyo palaban o pagiging daring.
"Naiisip ko na rin ngang magbabad sa gym at magpalaki ng katawan," tuloy-tuloy na sabi pa ni Dino. "In preparation na rin for a new image, kaya lang, nakakatamad na mag-isa ako sa gym. Gusto kong magkaroon ng gym buddy, na tutulong sa akin, lalo kung magbubuhat ng mabibigat. Dyahe kasi kung papatulong ka sa ibang strangers na nandodoon sa gym."
Sinubukan ni Dino na magpunta sa isang gym na malapit sa pinapasukan niyang school, sa La Salle-St. Benilde, sa Taft Ave., Manila, na malapit din sa tinutuluyan niyang bahay.
Ang stint niya sa natapos na comedy show na Volta ay lumikha ng ingay nang mapansin ng televiewers na masyado raw bakat ang harapan ni Dino sa tight-fitting costume niya as a superhero na anak ni Ai-Ai delas Alas.
"Oo nga, hanggang ngayon, pinag-uusapan pa rin 'yan, e, wala na yung show," banggit ni Dino. "Walang daya yun. Hindi ako gumamit ng lavacara doon ah! Napansin ko lang, kapag nasa mall ako or public place, yung mga tao, bigla na lang titingin doon sa harapan ko. Nakaka-conscious upon realizing na ganoon ang effect sa kanila. Pero natatawa na lang ako. I just got used to it."
At pumasok nga sa isipan niya na puwede nga siguro siyang mag-gym nang husto para gumanda ang katawan.
"Baka nga yun ang gusto ng mga tao. Why not? Pero sasamantalahin ko muna itong wholesome roles na ibinibigay sa akin dahil minsan lang naman akong maging bata, di ba? Ayokong magmadali," sabi ni Dino.
Gusto sana ni Dino na mag-concentrate sa drama gaya sa ginagawa niya sa Prinsesa ng Banyera, pero may opportunities for him to do comedy, gaya sa Parekoy. Nakapag-umpisa na si Dino na mag-taping dito, na ang nagdidirek sa bagong show na ito ng ABS-CBN ay si Randy Santiago.
"April 9 ang eksaktong birthday ko, pero yun ang unang araw ng taping ko, kaya trabaho ang inatupag ko," nangingiting sabi ng binata. "Nerdy-nerdy ang role ko sa Parekoy. I'm happy kasi dumating yung bagong work nang patapos na kami for Astigs. May pagka-underdog naman ako doon, kaya iba-iba na yung naa-assign sa akin. I don't think na mata-typecast ako."
CONFLICT WITH ENCHONG. Naalaala naming bigla ang conflict sa kanila ng co-star niya sa Astigs na si Enchong Dee. Noong una, akala namin ay biru-biruan lang 'yon, noong panahon pa ng Abt Ur Luv.
"Parang nagkapersonalan, pero dinadaan ko lang noon sa biro yun," pagtatapat ni Dino.
Ang tila cause ng conflict daw sa kanila ay si Empress Schuck. Totoo ba ito?
"Dapat kasi, hindi. Hindi ko niligawan si Empress. I find her too young. Hindi talaga," sumpa ni Dino.
Lumapit daw si Enchong sa kanya at kinumpronta siya.
"Diniretso niya ako, na kesyo may naririnig daw siya na sinisiraan ko raw siya," kuwento ni Dino. "Naguluhan ako. I think it's more of case ng maling akala. Nagkaroon ng paliwanagan. Pareho naman kaming cool ni Enchong. Wala namang nangyaring gulo. Pinag-usapan lang namin, and then, tapos na yun."
Inamin ni Dino na hindi taga-showbiz ang current girlfriend niya.